Bankların fəaliyyət növləri artırılıb. Qərb ölkələrində olduğu kimi, Azərbaycan bankları investisiya şirkətlərinin xidmətlərini də göstərəcəklər.

Banklar tərəfindən investisiya xidmətlərinin həyata keçirilməsi qaydası hazırlanacaq - FƏRMAN

FED.az xəbər verir ki, Azərbaycanın kommersiya bankları “Qiymətli kağızlar bazarı haqqında” Azərbaycan Respublikasının Qanununda nəzərdə tutulan həcmdə və qaydada qiymətli kağızlar və törəmə maliyyə alətləri ilə investisiya xidmətlərinin (əməliyyatlarının) həyata keçirilməsi fəaliyyətilə də məşğul ola biləcəklər. Bununla əlaqədar "Banklar haqqında qanuna" müvafiq 32.1.6-2-ci maddə əlavə edilib. Qanuna əlavə və dəyişikliklər Azərbaycan Prezidenti tərəfindən imzalanıb.

"Qiymətli kağızlar haqqında" qanuna edilən dəyişikliyə görə, Qanunun 30.3-cü (Əsas investisiya xidmətləri ) və 30.4-cü (Yardımçı investisiya xidmətləri) maddələri ilə müəyyən edilmiş investisiya xidmətləri Azərbaycan Respublikasında fəaliyyət göstərən banklar və xarici bankların yerli filialları tərəfindən müəyyən edilmiş qaydada lisenziya alınmaqla Mərkəzi Bank tərəfindən müəyyən edilən həcmdə və qaydada həyata keçiriləcəkdir. 

Qeyd edək ki, dünən Azəraycan Prezidentinin Fərmanı ilə, Mərkəzi Banka banklar və xarici bankların yerli filialları tərəfindən investisiya xidmətlərinin həyata keçirilməsi həcmini və qaydasını altı ay müddətində təsdiq edib, Azərbaycan Respublikasının Prezidentinə məlumat vermək tövsiyə olunub. 

İnvestisiya şirkəti və onun xidmətləri

İnvestisiya şirkətləri əsas və yardımçı investisiya xidmətləri göstərir.

Əsas investisiya xidmətləri (əməliyyatları) aşağıdakılardır:

- qiymətli kağızlar və ya törəmə maliyyə alətləri ilə aparılan əməliyyatlarla bağlı müştəri sifarişlərinin qəbul və icra edilməsi;

- fərdi investorların portfelinin idarə edilməsi;

- investisiya məsləhətlərinin verilməsi;

- qiymətli kağızların öhdəlik götürmədən yerləşdirilməsi və anderraytinqi;

- qiymətli kağızların öhdəlik götürməklə yerləşdirilməsi və anderraytinqi;

- mərkəzi depozitarın və fond birjasının üzvü qismində öz hesabına qiymətli kağızlar və ya törəmə maliyyə alətləri ilə əməliyyatlar aparılması;

- marja ticarəti.

Yardımçı investisiya xidmətləri (əməliyyatları) aşağıdakılardır:

- müştərisinin qiymətli kağızlar hesablarının idarə edilməsi, o cümlədən qiymətli kağızların və ya törəmə maliyyə alətlərinin öhdəliklərlə yüklənməsi ilə bağlı əməliyyatların həyata keçirilməsi;

- investorlara qiymətli kağızlar və ya törəmə maliyyə alətləri ilə həyata keçirdiyi əqdlərin bağlanması üçün kredit və ya digər formada borc verilməsi;

- qiymətli kağızlar və ya törəmə maliyyə alətləri ilə bağlı investisiya tədqiqatı və maliyyə təhlilinin aparılması;

- təmin edilmiş istiqrazlar üzrə təminatın sərəncamçısı xidmətinin həyata keçirilməsi;

- əsas investisiya xidmətlərinin (əməliyyatlarının) həyata keçirilməsi ilə bağlı xarici valyuta mübadiləsi.

Marja ticarəti investora baza aktivi (qiymətli kağız, valyuta, faiz dərəcələri, gəlirlilik, törəmə maliyyə alətləri, əmtəə, maliyyə indeksi, kredit riskləri və s.) və ya bu baza aktivlərinin qiyməti, gəlirliliyi, məzənnə fərqi, risk dərəcəsinin öz vəsaiti və ya borc vəsaitləri ilə alınıb sonradan satılmasının təşkili üzrə investisiya xidmətidir (əməliyyatıdır).

Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.