Dünyanın tanınmış beynəlxalq reytinq agentliyi "Fitch" Amerika Birləşmiş Ştatlarının uzunmüddətli kredit reytinqini "AAA"dan "AA+" səviyyəsinə endirib.
FED.az “Fitch Ratings”ə istinadla xəbər verir ki, ABŞ-ın kredit reytinqi son 12 ildə ilk dəfə olaraq aşağı salınıb.
Eyni zamanda agentlik, kredit reytinqi ilə bağlı proqnozu "mənfi"dən "sabit"ə dəyişib.
Bildirilib ki, ABŞ-ın reytinqinin aşağı salınması növbəti üç il ərzində gözlənilən maliyyə vəziyyətinin pisləşməsini, yüksək və artan ümumi hökumət borc yükünü və son iki ildə “AA” və “AAA” reytinqli həmkarlarına nisbətən idarəetmənin aşınmasını əks etdirir.
ABŞ hökuməti reytinq agentliyinin qərarı ilə qətiyyən razılaşmır. Məsələ ilə bağlı açıqlama verən ABŞ-ın maliyyə naziri Canet Yellen "Fitch"in qərarı ilə qətiyyən razılaşmadığını bildirib. "Fitch"in qərarı amerikalıların, sərmayəçilərin və dünyadakı insanların onsuz da bildiklərini dəyişmir", - deyə C.Yellen əlavə edib.
Qeyd edək ki, ABŞ-ın kredit reytinqi sonuncu dəfə 2011-ci ildə başqa bir reytinq agentliyi olan "Standard & Poor's" tərəfindən aşağı salınmışdı.
