“Turan Bank” ASC bu ilin 3-cü rübünü 404 min manat mənfəətlə başa vurub. Ötən ilin eyni dövründə isə bankın mənfəəti 1 milyon 414 min manat olub.
Eləcə də bax: Azərbaycan bankları 3-cü rübü belə başa vurdu – MƏNFƏƏT-ZƏRƏR – SİYAHI
FED.az biznes və maliyyə xəbərləri portalı Banker.az-a istinadən xəbər verir ki, bu barədə Bankın maliyyə hesabatında bildirilir.
GƏLİRLƏRİ ARTIB
Yanvar-sentyabr aylarında “Turan Bank”ın gəlirləri 34 milyon 522 min manat (illik müqayisədə 15% çox), xərcləri 33 milyon 491 min manat (18% çox) təşkil edib.
BANK BÖYÜYÜB, KREDİT PORTFELİ ARTIB
Bu il oktyabrın 1-nə “Turan Bank”ın aktivləri 671 milyon 282 min manat olub ki, bu da ötən ilin sonuna nisbətən 22% çoxdur. Bunun 408 milyon 819 min manatı müştərilərə verilmiş kreditlərdir. Son 9 ayda Bankın kredit portfeli 16.4% böyüyüb.
DEPOZİT PORTFELİ ARTIB
Hesabat dövründə “Turan Bank”ın öhdəlikləri 24% artaraq 584 milyon 725 min manata, o cümlədən depozit portfeli 29% arataraq 361 milyon 854 min manata, balans kapitalı 8% artaraq 86 milyon 557 min manata çatıb.
Xatırladaq ki, “Turan Bank” 1992-ci ildə yaradılıb. Bankın səhmlərinin 55,3%-i 20 fiziki şəxsə, 44,7%-i isə 8 hüquqi şəxsə məxsusdur.
