“AccessBank”ın işçi heyətinin təxminən 35%-i xanımların payına düşür. Bu barədə bankın İdarə Heyətinin sədri Anar Həsənov Azərbaycan Banklar Assosiasiyasının (ABA) təşkilatçılığı ilə keçirilən “Cəmiyyətdə qadın menecerin rolu” adlı tədbirdə çıxışı zamanı bildirib.
“Əgər bir cəmiyyətdə qadın menecerlərin rolundan danışırıqsa, qeyd etməliyəm ki, ölkənin ən iri işəgötürənlərindən biri olan “AccessBank”da menecer olan xanımların sayı az deyil. Onlar department və filial rəhbəri kimi məsuliyyətli vəzifələrdə çalışırlar. Bir şey dəqiqdir ki, onlar işinin öhdəsindən layiqincə gəlir. Hər bir kollektivdə olduğu kimi, “AccessBank”ı da gözəlləşdirən məhz bizim xanımlardır”, - deyə o vurğulayıb.
Onun sözlərinə görə, idarəçiliklə məşğul olan bir çox xanımlar eyni zamanda həm möhkəm olmağı, həm incəlik və zərifliyini qorumağı bacarmalıdır: “Heç kəsə sir deyil ki, onların qayğıları yalnız iş yeri ilə bitmir. Çünki onlar menecer olmaqla yanaşı, həm ana, həm də həyat yoldaşıdır. Bu isə xanımların çiynində hansı yükün olmasından xəbər verir”.
Xanım və kişi menecerləri müqayisə edən bankir bildirib ki, qadınlar nisbətən çevik, diplomatik, ünsiyyətçil olduğu üçün idarəçiliyi daha yaxşı bacarırlar. Daha bir üstünlük kimi Anar Həsənov qəti qərarların xanımlar tərəfindən daha tez qəbul olunduğunu qeyd edib: “Sözsüz ki, “qadın intuisiyası”nın burada rolu böyükdür”.
Tədbirin sonunda Anar Həsənov bütün xanımları qarşıdan gələn 8 mart münasibətilə təbrik edib, onlara daim xoşbəxt olmağı və gülərüz qalmağı arzulayıb.
Sədr: “AccessBank”ın kollektivinin 35%-i xanımlardır
17:27
6 Mart 2019
