Azərbaycanda iş adamlarının xaricə ödənilən avans ödənişlərinə görə, sahibkarların cərimələnməsi mövzusu ötən şəftənin sonunda Azərbaycan Mərkəzi Bankında sahkbakralarla keçirilən görüşdə də müzakirə edilib.
FED.az xəbər verir ki, görüşdə bu məsələni sahibkarlar adından Azərbaycan Sahibkarlar Konfederasiyasının (ASK) sədri Məmməd Musayev qaldırıb.
Eləcə də bax: Mərkəzi Bank 2019-da dolları - UCUZLAŞMAQDAN QORUYUB – ELMAN RÜSTƏMOV
O bildirib ki, Azərbaycanda sahibkarları narahat edən xüsusi məsələlərdən biri də valyuta tənzimi rejimi ilə bağlıdır.Hal-hazırda qüvvədə olan Qaydalara əsasən xaricə ödənilmiş avans ödənişləri müqabilində alınan mal 270 gün ərzində Azərbaycan Respublikasına idxal edilməlidir.
«Həmin müddət ərzində mallar idxal edilmədikdə, xidmətlər göstərilmədikdə və ya qabaqcadan ödənilmiş məbləğ geri qaytarılmadıqda sahibkarlıq subyektləri yüksək məbləğdə cərimə edilirlər»-deyə M.Musayev bildirib.
ASK sədri bildirib: «Qeyd etmək istərdik ki, həyata keçiriləcək idxal əməliyyatlarının bir sıra obyektiv səbəblərdən xaricdəki avadanlıq istehsalçılarının öz planlamaları, sifarişlərin növbəliliyi, sifariş olunan avadanlıqların hazırlanmasının böyük və mürəkkəb texnoloji proses olması, hazırlıq prosesində texniki dəyişikliklərin edilməsi və maliyyə məsələləri, o cümlədən növbəti ödənişlərin edilməsində maddi problemlərin, gecikmələrin olması, xarici istehsalçıların müqavilə öhdəliklərini vaxtında yerinə yetirməməsi və ya müqavilədə istehsal ediləcək avadanlığın hazırlanma müddəti ilə qanunvericilikdə qeyd edilən müddətin uyğunlaşmaması halları baş verir. Eləcə də avadanlıq hissələr şəklində daxil olaraq burada yığılır və bu zaman da sənədləşmədəki fərqləri əsas gətirərək sahibkarlara cərimə tətbiq edilir.
Təklif edirik ki, valyuta tənzimi əvvəlki formaya 360 günə qaytarılsın və bundan əlavə bəzi mürəkkəb avadanlıqların idxalı zamanı xüsusi mexanizmlər, məsələn sövdələşmə tarixçəsi tətbiq edilsin».
Dövlət qurumlarının bu təklifə münasibətinin necə olacağı hələlik məlum deyil. Amma son prosesləri, o cümlədən AMB-nin sahibkarlarla görüşüb problemlərini dinləməsini nəzərə alanda, gözləmək olar ki, ya qayda dəyişəcək, ya da onun icrasında daha yumşaq yanaşma tətbiq ediləcək.
