Rabitəbank ilə İslam İnkişaf Bankı (İİB) Qrupu üzvü Ticarətin Maliyyələşdirilməsi üzrə Beynəlxalq İslam Korporasiyası (İTFC) arasında özəl sektorun, xüsusən də KOB müştərilərinin ticarət maliyyələşdirmə ehtiyaclarını ödəmək və Azərbaycanda şəriətə uyğun ticarətin maliyyələşdirilməsi həllərinin təşviqinə töhfə vermək üçün 10 milyon ABŞ dolları məbləğində “Letter of Credit Confirmation Facility” (Akkreditiv) müqaviləsi imzalanıb.

FED.az xəbər verir ki, bu müqavilə Rabitəbanka Azərbaycanda özəl sektor, xüsusilə də KOB-lar üçün ticarətin maliyyələşdirilməsi işini genişləndirməyə kömək etmək üçün nəzərdə tutulub.

Bu müqavilə Rabitəbank-ın İdarə Heyətinin sədri Aydın Hüseynov və İTFC-nin baş direktoru Hani Salem Sonbol arasında imzalanıb.

Rabitəbankın yaydığı məlumatda bildirilir ki, qeyd olunan vəsait Banka ticarətin maliyyələşdirilməsi üzrə həllər təklif etməyə və Azərbaycanda İslam maliyyəsinin inkişafına töhfə verməyə imkan verəcək.

"Bu müqavilə İTFC tərəfindən Azərbaycanda fəaliyyət göstərən kommersiya banklarına kredit xətti açılması haqqında ilk saziş hesab olunur və üzv ölkələrdə özəl sektor və kiçik və orta sahibkarlığa dəstək verilməsi üçün banklarla əməkdaşlığın genişləndirilməsini, eləcə də kredit xətti açılması biznesinin genişləndirilməsini prioritet hesab edən İTFC-nin Özəl Sektor Strategiyası ilə uyğunluq təşkil edir",- məlumatda bildirilir.

İTFC-nin baş direktoru Hani Salem Sonbol müqavilənin imzalanması ilə aşağıdakıları  bildirib: “Rabitəbank ilə bu yeni tərəfdaşlıq Azərbaycanda bank fəaliyyətlərimizi yenidən aktivləşdirmək və özəl sektorun böyüməsi və inkişafına olan sadiqliyimizin xüsusi əhəmiyyətini bir daha nəzərə çatdırmaq məqsədi daşıyır. İTFC, İƏT-ə üzv ölkələrdə şəriətə uyğun ticarət maliyyələşdirməsinin təşviqində qabaqcıl olaraq qalır və biz bu müqaviləni Azərbaycanda İslam maliyyə təkliflərinin inkişafına açıq dəstək hesab edirik”.

Rabitəbank ASC-nin İdarə Heyətinin Sədri Aydın Hüseynov isə öz növbəsində qeyd edib: "Öncəliklə, uzun illərdən sonra bağladığımız bu müqavilə ilə İTFC-nin Rabitəbank ilə Azərbaycan maliyyə-kredit bazarına daxil olması bizim üçün çox sevindirici və ölkəmiz üçün önəmlidir. Bu müqavilə özəl sektorun, xüsusən də KOB müştərilərinin ticarət maliyyələşdirmə ehtiyaclarını ödəmək və Azərbaycanda şəriətə uyğun ticarətin maliyyələşdirilməsi həllərinin təşviqinə töhfə verməsi cəhətdən çox vacibdir.”

2009-cu ildən bəri İTFC Azərbaycanda müxtəlif özəl sektor müştərilərinə 83,4 milyon ABŞ dolları məbləğində yardım göstərmişdir. İTFC Azərbaycanla əməkdaşlığı yüksək qiymətləndirir və yerli kommersiya banklarını lazımi maliyyələşdirmə ilə təmin etməklə ölkənin ticarətinin inkişafına sərmayə qoyur.