"Kapital Bank" ASC bu il yanvarın 1-nə adi və imtiyazlı səhmdarlarının pay bölgüsünü açıqlayıb.
Kapital Bank mikro kreditlərin - FAİZLƏRİNİ ENDİRDİ
FED.az xəbər verir ki, bu barədə Bankın illik idarəetmə hesabatında bildirilir.
Sənədə əsasən, ötən il "Kapital Bank"ın səhmlərinin sahibi olan hüquqi şəxslərin sayı 1-dən 2-yə çatıb. Yeni səhmdar "ABB-İnvest İnvestisiya Şirkəti" QSC-dir. Maliyyə qurumu 60 ədəd adi və 732 ədəd imtiyazlı səhm alaraq Bankın səhmdarlarının sırasına qoşulub. Onun kredit təşkilatının nizamnamə kapitalındakı payı cəmi 0,02 %-dir və bu pay fiziki şəxslərdən alınıb.
"Kapital Bank"ın əsas səhmdarı yenə də "PAŞA Holdinq" MMC-dir. Holdinq birbaşa Bankın 16 614 205 ədəd adi səhminin 16 593 164-nə, 4 842 615 ədəd imtiyazlı səhminin isə 804 254-nə sahibdir. Beləliklə, onun kredit təşkilatındakı payı 81,08 %-dir.
Bundan başqa, "PAŞA Holdinq"ə daxil olan "PAŞA Həyat Sığorta" ASC "Kapital Bank"ın 807 102 ədəd, "PAŞA Sığorta" ASC isə 1 614 205 ədəd imtiyazlı səhminə malikdir. Beləliklə, onların Bankdakı payı müvafiq olaraq 3,76 % və 7,52 %-dir.
Eyni zamanda, holdinqə yaxın sayılan "Bless" və "Reveri" MMC-lər də hər biri "Kapital Bank"ın 604 750 ədəd imtiyazlı səhminə sahibdir. Beləliklə, onların hər birinin Bankdakı payı 2,82 %-dir.
Fiziki şəxslərə gəlincə isə, onlar, "Kapital Bank"ın 20 981 ədəd adi və 406 822 ədəd imtiyazlı səhmə malikdir. Beləliklə, sadə vətəndaşların Bankdakı payı 1,98%-dir.
Son 1 ildə "Kapital Bank"ın adi səhmdarlarının sayı 8 vahid və yaxud 4,15 % artaraq 201-ə çatıb. O cümlədən, Bankın adi səhmlərinin sahibləri olan fiziki şəxslərin sayı 7 nəfər və yaxud 3,65 % artaraq 199-a yüksəlib. Bankın imtiyazlı səhmdarlarının sayı isə dəyişməyərək 77 qalıb. Bunlardan 6-sı hüquqi şəxs, 71-i isə fiziki şəxsdir.
Xatırladaq ki, "Kapital Bank" 2004-cü ildə, Birləşmiş Universal Səhmdar Bankının ("BUSbank") bazasında yaradılıb. Onun nizamnamə kapitalı 265,85 milyon manatdır. Bu məbləğ hər birinin nominal qiyməti 12,39 manat olan 21 456 820 səhm əsasında formalaşıb. (Report)
