Hər birimiz bilirik ki, plastik kartlar vasitəsi ilə ATM-dən pul çəkmək üçün PİN koddan istifadə olunur və bu kod üç dəfədən artıq yanlış daxil edilərsə, kartınız bloka düşür. Bunun əsas əhəmiyyəti təhlükəsizlik ilə bağlıdır ki, kartınızdan yad insanlar istifadə etməsin.
Amma bəzən olur ki, insanlar özləri öz PİN kod nömrələrini unudur və kartdan istifadə zamanı kart bloka düşür. Belə halda nə etməli?
- İlk növbədə kartı emissiya edən bank ilə əlaqə saxlayıb, kartı blokdan çıxarmaq istədiyinizi deməlisiniz.
- Bank əməkdaşı isə sözü gedən kartın həqiqətən sizə aid olduğunu təsbit etməlidir. Bunun üçün o sizin şəxsiyyət vəsiqənizin nömrəsini soruşacaq və kartı sizə verərkən, banka vermiş olduğunuz “kod söz” soruşulacaq.
Bəzən insanlar “kod sözə” sadəcə prosedur gərəyi kimi baxır və asanlıqla unuda biləcəkləri bir söz və ya rəqəm kombinasiyası verirlər. Belə etməyin, sizin üçün əhəmiyyətli olan və yadınızdan çıxmayacaq kod söz seçin.
Bankdan sizə verilmiş PİN – kodu isə evdə etibarlı yerdə saxlaya bilərsiniz. Yəni bu kod yalnız sizə bəlli olur və heç bir halda bank əməkdaşları onu bilmir. Kodu itirdikdə, artıq bankdan yeni kod almalı və ya kartı dəyişdirməli olacaqsınız. İtmiş kodun dəyişdirilməsi əlafə məsrəf -yəni komisyon haqq tələb edə bilər.
Şəxsiyyət vəsiqəsi və kod söz vasitəsi ilə kartı blokdan çıxarmaq çox asan olacaq. Siz həmçinin mobil banking və internet banking xidmətlərindən də yararlana bilərsiniz.
