Azərbaycanda ödəniş sistemində növbəti maraqlı məhsul təqdim edilib. FED.az xəbər verir ki, «Bank Respublika» özünün «Mastercard Paypass Sticker» ictimaiyyətə açıqlayıb. Bu Azərbaycan bazarında ilk dəfə tətbiq olunur. 

Kiçik və orta sahibkarlığın 150-dən çox nümayəndəsi, eləcə də bankın müştərilərinin qatıldığı tədbirdə elan edildi ki, «Paypass Sticker» - MasterCard PayPass kartlarının daha kiçik ölçülü innovativ məhsuldur. Bu stiker vasitəsilə müştərilər bir toxunuşla rahat, asanlıqla və təhlükəsiz bir şəkildə ödəniş edə biləcəklər. Stikeri, və ya onun yapışdırıldığı əşyanı - supermarketdə, yanacaqdoldurma məntəqəsində, restoran-kafedə və s. yerlərdə təmassız POS terminala yaxınlaşdlrmaq kifayət edir ki, ödəniş yerinə yetirilsin. PayPass Stiker bir saniyəyə ödəniş etməyə imkan verir. 

Kiçik ölçülüdür, hər yerə yapışır
Daha sadə desək, Stiker-kart –daha kiçik ölçülü, və yapışdırıla bilən kartdır. Ölçüləri 2,5 sm X 4 sm-dir, yəni bizim öyrəşdiyimiz plasti kartdan 3 dəfə kiçik. Kiçik ölçülərinə görə, müştəri onu istədiyi əşyaya yapışdıra bilər. Bu əşya telefon, çanta, açar breloku, portmane, saat və sair ola bilər. 

Pin-kodsuz ödəniş limiti 50 manatdır
Stiker-kartla birdəfəlik ödəniş limiti 50 manatdır. Yəni 50 manata qədər alışlar üçün ödəniş etdikdə PİN-kodu tələb olunmur. Qeyd edək ki, oxşar funksiyalı kartlar indi də var, amma onların limiti daha azdır. Burada isə limit 50 manata qədərdir. 
PayPass Stikerlə 50 manatdan artıq, istənilən məbləğdə ödənişlər etmək olar, sadəcə bu zaman pin kod daxil etmək lazım olacaq. 

Stiker-kart oğurlansa, itirilsə necə olacaq?
Plastik kartların, ümumiyyətlə bütün asan ödəniş vasitələrinin ənənəvi problemi – itirilmək və ya oğurlanmaq məsələsi Stiker-kartlar üçün də aktualdır. Doğrudan da, «stikerin yapışdırıldığı qurğu, məsələn telefon oğurlansa, unudulsa, nə baş verəcək, ondan istifadənin qarşısı necə alınacaq?» sualına bank nümayəndələri bildirir ki, adi plastik kart itib-oğurlananda hansı addım atılırsa, «PayPass Stiker»in yapışdırıldığı əşya itəndə də eyni addım atılmalıdır. Hər ehtimala qarşı strikerlərdə belə hallarla bağlı əlavə ehtiyat tədbiri də var – gün ərzində pin kod tələb olunmadan yalnız 3 ödəmə edilə bilər. 4-cü ödəmədə pin kod tələb olunacaq. Bu da striker sahibinin mümkün zərərdən qorumaq üçündür. 

Qiyməti 20 manatdır, 5 il işləyir 
Paypass Stiker ayrıca və ya mövcud kart hesabına bağlı verilə bilər. Yəni onu almaq üçün yeni hesab açmamaq da olar. Stikerin qiyməti 20 manatdır, 5 il qüvvədə olacaq, illik xidmət haqqı yoxdur. «Bank Respublika»nın istənilən filialından əldə etmək mümkündür. 

Mobil bankinqdə də istifadə oluna bilər
Pay-pass striker təkcə nağdsız ödənişlərdə istifadə olunmur. Onun başqa bir imkanı mobil bankinqdə istifadə olunmasıdır. Telefonunda «Bank Respublika»nın mobil bankinqi olan müştərilər bu məhsuldan istiıadə edib ödəniş edə bilərlər. Amma Pay-pass striker vasitəsilə bankomatdan pul çıxarmaq və ya internetlə onlayn ödəniş etmək mümkün deyil. 

«Azərbaycana bu texnlogoyanı ilk dəfə biz gətirdik»
«Bank Respublika»da ümid edirlər ki, müştərilər onun üstünlüyünü lazımınca qiymətləndirəcəklər: «MasterCard PayPass bir toxunuşla ödəniş texnologiyası qeyri-nağd ödənişlər dönəminə bir yenilik gətirdi, çünki onun yaranması ilə bank kartının yalnız ödəniş vasitəsi kimi olması faktı ortadan qalxdı. Sevindirici haldır ki, Azərbaycan bazarında bu texnlogoyanı ilk dəfə məhz Bank Respublika təqdim etdi. Ümid edirəm ki, müştərilərimiz MasterCard PayPass stikerlərinin rahatlığını yüksək qiymətləndirəcək, çünki bu məhsul nağdsız ödənişləri daha rahat və daha sürətli edəcək» deyə «Bank Respublika» İdarə Heyətinin sədri Tariyel İsmayılov qeyd etdi. 

Klassik bankçılıqdan rəqəmsal bankçılığa keçid
Əslində «Bank Respublika»nın innovativ yenilikləri indiyədək də kifayət qədər idi. «Klassik bankçılıqdan rəqəmsal bankçılığa keçiddə uğurların açarı innovativ texnologiyaların tətbiqidir»-deyən T.İsmayılovun sözlərinə görə, bank öz sahəsində texnoloji liderlərdən biri olmağa çalışır. 
Hazırda bu məhsullar vasitəsilə dünyanan istənilən nöqtəsindən bank məhsullarından yararlanmaq mümkündür. Son vaxtlar bankda kredit və digər kartların sifarişinə imkan yaradan onlayn müraciət istemi də qurulub. 
Təsadüfi deyil ki, 2018-ci ildə «Bank Respublika» həm Mərkəzi Bank (AMB), həm də Azərbaycan Banklar Assosiasiyası (ABA) tərəfindən elektron bankçılığa görə iki mükafat alıb. AMB-tərəfindən «Elektron bankçılıq xidmətində lider bank» mükafatı, ABA tərəfindən isə «İnnovativ ödəniş həllərini» təqdim edən ən aktiv bank mükafatı təqdim edilib.