Azərbaycanın ən iri banklarından olan "PAŞA Bank" ASC bu gün 2022-ci ilin I yarım ili üzrə maliyyə nəticələri ilə bağlı mətbuat konfransı keçirib.
Konfransda "PAŞA Bank Azərbaycan"la bərabər "PAŞA Bank Türkiyə" və "PAŞA Bank Gürcüstan"ın da audit və konsolidasiya edilmiş maliyyə hesabatları səsləndiriib. Hesbat dövründə "PAŞA Bank" Azərbaycanın maliyyə sektorunda öz mövqeyini qorumağa və fəaliyyətini daha da genişləndirməyə davam edib.
FED.az xəbər verir ki, bank, 580 milyon 355 min manat dəyərində olan ümumi kapital həcmi ilə ölkənin ən böyük kommersiya bankı mövqeyini qoruyub saxlayıb (2021: 577 milyon 438 min manat). PAŞA Bankın cəmi aktivləri 8 milyard 59 milyon 186 min manat təşkil edib. Bu göstərici ötən ilin sonu ilə müqayisədə 15% artıb (2021: 7 milyard 8 milyon 183 min manat).
30 iyun 2022-ci il tarixinə Bankın aktivlərinin açıqlaması aşağıdakı kimidir:
-Pul vəsaitləri və pul vəsaitlərinin ekvivalentləri - 31%
-Müştərilərə verilmiş kreditlər - 37%
-Kredit təşkilatlarına verilmiş kreditlər - 7%
-Qiymətli kağızlar portfeli - 23%
-Digər cari və uzunmüddətli aktivlər - 2%
2022-ci ilin ilk yarısında PAŞA Bankın ümumi kredit portfeli 1% azalaraq 3 milyard 92 milyon 607 min manat (2021: 3 milyard 123 milyon 469 min manat) təşkil edib.
Qeyd olunan dövr ərzində davamlı şəkildə müştərilərə xidmət göstərən Bank, son illər ərzində inkişaf etdirdiyi biznes əlaqələrindən bəhrələnir. Bunun nəticəsi olaraq, PAŞA Bankın müştəri depoziti bazası 6 milyard 223 milyon 408 min manata (2021: 5 milyard 181 milyon 851 min AZN) çatıb.
Müştəri depozitləri əsasən tələbli və müddətli hesablarda müvafiq olaraq 72% və 28% nisbətində cəmlənib (2021: 70% and 30%).
PAŞA Bank qrupu 2022-ci ilin 6 ayı ərzində 19 milyon 177 min manat xalis mənfəət (2021 ci il 6 ayliq: 39 milyon 163 min manat) qazandığını elan edib. Eyni dövr üçün toplam əməliyyat gəlirləri 172 milyon 641 min manat təşkil edib ki, bu göstərici keçən ilin müvafiq dövrü ilə müqayisədə 17% çoxdur.
Beynəlxalq maliyyə institutları ilə əhatəli danışıqlar sayəsində geniş miqyaslı maliyyə alətlərindən istifadə imkanı əldə edən PAŞA Bank, korporativ müştərilərinə daha çox ticari maliyyə xidmətləri göstərməyə nail olub. Bank, həmçinin “Standard & Poor's” Qlobal Reytinq agentliyindən kredit reytinqi aldıqdan sonra müştərilərin maliyyələşdirilməsi üçün daha yaxşı şərtlər əldə edib. Bank, institusional səviyyədə müştərilərlə münasibətdə məhsuldarlığı artıraraq vaxtında peşəkar xidmətlər göstərmək üçün müxtəlif seminarlar və təlimlər keçirib.
