30 sentyabr 2018-ci il tarixinə Azərbaycanda fəaliyyət göstərən bankların cəmi aktivləri 29 milyard 201.8 milyon manat, kredit portfeli 11 milyard 901.4 milyon manat, cəmi öhdəlikləri isə 25 milyard 89 milyon manat təşkil edib.
Maliyyə Bazarlarına Nəzarət Palatasından FED.az-a daxil olmuş məlumata görə, sektorun balans kapitalı 4 milyard 112.8 milyon manat olub.
2018-ci ilin sentyabr ayı ərzində bank sektorunun aktivləri 3.8% (1 milyard 74.7 milyon manat), öhdəlikləri 4.2% (1 milyard 11.5 milyon manat), balans kapitalı isə 1.6% (63.2 milyon manat) artıb.
Sentyabr ayında bankların kredit portfelinin dinamikasında əhəmiyyətli dəyişiklik baş verməyib. Cari ilin əvvəli ilə müqayisədə isə bank sektorunun kredit portfeli üzrə 5% (563.8 milyon manat) artım olub.
Sentyabr ayında fiziki şəxslərin əmanətləri 2.2% (175 milyon manat) artaraq 8 milyard 114.9 milyon manat təşkil edib. Ümumilikdə, 2018-ci ilin 9 ayında fiziki şəxslərin əmanətləri 7.6% artıb.
Bank sektoru cari ilin 9 ayı ərzində 509.1 milyon manat əməliyyat mənfəəti, 171.8 milyon manat xalis mənfəət generasiya edib.
Fəaliyyət göstərən 30 bankın filiallarının sayı 511, şöbələrinin sayı 143, ATM-lərin sayı 2 479 olub.
Bank sektorunun işçi heyəti sentyabr ayında 0.8% (138 nəfər) artaraq 17 066 nəfər təşkil edib. Ümumilikdə isə cari ilin 9 ayında sektorda çalışanların sayı 5.5% (895 nəfər) artıb.
