“Muğanbank” ASC 31 dekabr 2018-ci il tarixində başa çatmış il üzrə Maliyyə Hesabatlarının Beynəlxalq Standartlarına Uyğun Hazırlanmış Maliyyə Hesabatlarını dərc edib.
FED.az hesabata istinadən xəbər verir ki, 2017-ci illə müqayisədə 2018-ci ildə cəmi müştərilərə verilmiş kreditlər 5 milyon 666 min manat artaraq 342 milyon 318 min manata yüksəlib. Artım korporativ kreditlər ilə bağlıdır. Belə ki, ötən il korporativ kreditlər 40 milyon 306 min manat və ya 44% artaraq 131 milyon 424 min manata yüksəlib. 2017-ci ilin sonunda korporativ kreditlər 91 milyon 118 min manat təşkil etmişdi.
Eləcə də bax: 11 bankın qiymətli kağızlara investisiyaları azalıb - SİYAHI
Fiziki şəxslərə verilmiş ipoteka kreditləri 3 milyon 766 min manat və ya 4% artaraq 99 milyon 229 milyon manata çatıb.
Fiziki şəxlərə verilmiş təqaüdçü krediti 22,5% azalaraq 74 milyon 334 min manata, istehlak kreditləri 1,5% azalaraq 25 milyon 807 min manata, avtomobil alışı üçün verilən kreditlər 37,2% azalaraq 2 milyon 962 min manata düşüb. Fiziki şəxslərə verilmiş sahibkarlıq kreditləri isə 25% azalaraq 67 milyon 525 min manata geriləyib. Korporativ və ipoteka kreditlərindəki artım bu azalmaları artıqlaması ilə bağlayıb.
FAİZ GƏLİRLƏRİ ARTIB
“Muğanbank” 2018-ci ildə müştərilərə verilmiş kreditlərə 40 milyon 574 min manat faiz hesablayıb. Bank 2017-ci ildə müştərilərə verilmiş kreditlərə 35 milyon 913 min manat faiz hesablamışdı.
GƏLİRLƏRİ ARTIB, ÖTƏN İLİ MƏNFƏƏTLƏ BAŞA VURUB
Maliyyə hesabatından məlum olur ki, “Muğanbank” ASC 2018-ci ili 1 milyon 36 min manat xalis mənfəətlə başa vurub. Halbuki, Bank 2017-ci ili 7 milyon 825 min manat zərər ilə bağlamışdı. Həmin il zərərin yaranmasının səbəbi ehtimal olunan kredit zərərləri üçün 20 milyon 977 min manatın ehtiyata ayrılması idi. “Muğanbank” 2018-ci ildə 5 dəfəyə yaxın az - 4 milyon 425 min manat ahtiyata ayırıb.
Ötən il “Muğanbank”ın cəmi faiz gəlirləri 8,7% artaraq 46 milyon 587 min manat, xarici valyuta əməliyyatları üzrə xalis gəlir 62% artaraq 1 milyon 479 min manat, haqq və komissiya gəlirləri isə 25,5% artaraq 12 milyon 147 min manat təşkil edib.
Ötən il “Muğanbank”ın cəmi faiz gəlirləri 8,7% artsa da, faiz xərclərinin daha çox - 59,2% artması diqqəti cəlib edir. Faiz xərcləri daha çox olduğundan illik müqayisədə xalis faiz gəliri azalıb.
BANK BÖYÜYÜB
31 Dekabr 2018-ci il tarixində “Muğanbank” 525 milyon 272 min manat cəmi aktivlərə malik olub, bu da 2017-ci ilin sonu ilə müqayisədə 12,5% çoxdur.
©Marja
