Bu gün Mərkəzi Bankın təşəbbüsü, Azərbaycan Banklar Assosiasiyasının, “Amrahbank” ASC, “Expressbank” ASC, “Atabank” ASC və “Bakı Sıgorta” ASC–nin iştirakı ilə əhaliyə Park Bulvar ticarət və əyləncə mərkəzində “Novruz xonçası” adlı maarifləndirici təbliğat xarakterlı tədbir keçirilib.

AMB-dən FED.az-a verilən məlumata görə, tədbir ərzində maliyyə savadlılığının əhali arasında ictimai dəyər kimi tanınması təbliğ olunmuş, bank və sığorta məhsulları haqqında, eyni zamanda ödəniş kartları və nağdsız ödənişlərin əhəmiyyəti haqqında əhaliyə məlumatlar verilib. Əhalinin müxtəlif yaş təbəqələrini əhatə edən bu tədbirdə onların maliyyə savadlılığı tədbirləri, bank və sığorta məhsulları və digər mövzular üzrə sualları cavablandırılıb.

Gəncləri xüsusilə “Maliyyə savadlılığı” köşkündə nümayiş etdirilən elektron resurslar və bank məhsulları və xidmətləri haqqında maarifləndirici animasiyalar maraqlandırdı. Tədbirə qatılanlara Mərkəzi Bankın, bank-maliyyə qurumlarının maarifləndirici və promo materialları, həmçinin bayram şirniyyatları paylanıldı. Bu cür təbliğat xarakterli maarifləndirici tədbirlərin gələcəkdə müxtəlif məkanlarda keçirilməsi nəzərdə tutulur.