Lisenziyası ləğv edilmiş “Dəmirbank”ın işdən çıxarılmış bir qrup əməkdaşları Əmanətlərin Sığortalanması Fondundan narazıdırlar.
“Dəmirbank”ın işçisi olmuş Ceyhun Əfəndiyev bildirib ki, Bankın ləğvedicisi olan Fond qanunvericilikdəki ziddiyyətdən istifadə edərək məzuniyyət haqlarını tam ödəmir:
"Əmanətlərin Siğortalanması Fondu ilə problemimiz yaranıb. Bildiyiniz kimi, “Dəmirbank” ASC-nin lisenzasiya alınıb və ləğvetmə prosesindədir. İşçiləri də Əmək Məcələsinin 70 (b) bəndi ilə ixtisar edilib. Əmək Məcəlləsinin 77-ci maddəsinə əsasən, ixtisarla bağlı ödənişləri həyata keçiriblər. Amma məzuniyyət haqlarını ödəməli olduğu halda, bununla bağlı hesablaşma olmadı. Baxmayaraq ki, Əmək Məcəlləsi 144-cü maddəsinə uyğun tam ödənilməlidir. Fonddan isə bildirirlər ki, “Banklar haqqinda” Qanunun 82.1.5-ci maddəsinə əsasən, son 6 aya görə, (30 gün məzuniyyətdən 15 günü üçün) ödəniş olacaqdır. Fond qanunvericilikdəki ziddiyətdən özünün xeyrinə istifadə edir".
Ceyhun Əfəndiyev qeyd edir ki, Fond işçiləri ixtisar etdiyindən çıxılmamış məzuniyyətin əvəzi tam ödənilməlidir. Onun sözlərinə görə, ləğv edilən digər bankların keçmiş əməkdaşları da tam ödəniş almağı tələb edir.
Əmanətlərin Siğortalanması Fondundan bildirilib ki, ləğvedici istənilən zaman bankın əməkdaşları ilə bağlanılmış əmək müqavilələrinə xitam verə bilər:
"Bakı Apellyasiya Məhkəməsinin 27 dekabr 2017-ci il tarixli qərarı ilə “DəmirBank” ASC müflis elan olunub. Azərbaycan Respublikasının “Banklar haqqında” Qanununun 71.7.6-cı maddəsinə əsasən ləğvedici istənilən zaman bankın əməkdaşları ilə bağlanılmış əmək müqavilələrinə xitam verə bilər.
Əmək Məcəlləsinin 70-ci maddəsinin “a” və “b” bəndləri ilə əmək müqavilələri ləğv edilərkən işçi ilə bağlanmış əmək müqaviləsinə uyğun olaraq müəyyən edilən iş stajından asılı olaraq işdən çıxarma müavinətləri ödənilib.
Azərbaycan Respublikasının “Banklar haqqında” Qanunun 82.1.5 maddəsində əsasən, bankın müflis elan olunmasına dair məhkəmə qərarının qəbul edildiyi tarixdən əvvəlki altı aydan çox olmayan dövr üçün ödənilməli müavinətlərin, əmək haqlarının verilməsi haqqında bankın işçilərinin və keçmiş işçilərinin tələblərinin ödənişi növbəlik əsasında həyata keçiriləcək.
Həmçinin qeyd etmək istərdik ki, bütövlükdə bank sisteminin fəaliyyətinin təmin edilməsi məqsədilə bankların təşkili, idarə edilməsi, fəaliyyətinin tənzimlənməsi və ləğv edilməsi prinsiplərini, qaydalarını və normalarını Azərbaycan Respublikasının “Banklar haqqında” Qanunu müəyyən edir və tənzimləyir.
