2017-ci ilin 9 ayı ərzində “Bank of Baku” ASC-nin cəmi gəlirləri 45 milyon 425 min manat (faiz gəlirləri 44 milyon 655 min manat, qeyri-faiz gəlirləri 770 min manat) təşkil edib.
Ötən ilin müvafiq dövrü ilə müqayisədə Bankın cəmi gəlirəri 2,2 dəfə azalıb. Belə ki, 2016-cı ilin 9 ayında “Bank of Baku”nun cəmi gəlirləri 100 milyon 446 min manat, o cümlədən faiz gəlirləri 80 milyon 228 min manat, qeyri-faiz gəlirləri isə 20 milyon 218 min manat təşkil etmişdi.
“Bank of Baku” xərclərini də azaltmağa nail olub. Cari ilin 9 ayında Bankın cəmi xərcləri 38 milyon 127 min manat təşkil edib və nəticədə 7 milyon 298 min manat əməliyyat mənfəəti qalıb. Bank mümkün zərərlərin ödənilməsi üçün yaradılan xüsusi ehtiyatlara 39 milyon 188 min manat ayırdığından 9 ayı 31 milyon 890 min manat zərər ilə bağlayıb. “Bank of Baku” 2016-cı ilin 9 ayını 37 milyon 659 min manat zərər ilə başa vurmuşdu.
“Bank of Baku” 30 Sentyabr 2017-ci il tarixində 433 milyon 678 min manat cəmi aktivlərə, 393 milyon 170 min manat cəmi öhdəliklərə və 40 milyon 508 min manat cəmi balans kapitalına malik olub.
Bank ötən ilin sonunda 549 milyon 609 min manat cəmi aktivlərə, 476 milyon 741 min manat cəmi öhdəliklərə və 72 milyon 867 min manat cəmi balans kapitalına sahib idi.
“Bank of Baku” 2015-ci ilin sonunda 750 milyon manat cəmi aktivlərə malik idi.
Bankın müştərilərə verdiyi kreditlər və lizinqlər ötən ilin sonundakı 252 milyon 321 min manatdan 196 milyon 741 min mmanata geriləyib.
30 Sentyabr 2017-ci il tarixində Bankın məcmu kapitalı 30 milyon 613 min manat təşkil edib.
