Rəqabətin artması ilə əlaqədar olaraq komissiyaların ləğv edilməsi və xidmət haqlarının aşağı salınması bankların qeyri-faiz gəlirlərini azaldır

Adətən bank dedikdə kredit verərək gəlir əldə edən qurum başa düşülür. Bankların verilmiş kreditlərdən əldə etdikləri gəlirlərə faiz gəlirləri deyilir.

Banklar kredit faizlərindən başqa, kreditlərə görə komissiya, hesablaşma hesabı, kartlar, valyuta mübadiləsi kimi xidmətlərdən də gəlir əldə edirlər. Belə gəlirlərə qeyri-faiz gəlirləri deyilir.

2017-ci ildə ən çox qeyri-faiz gəliri əldə edən banklar məlum olub. Ən çox qeyri - faiz gəliri əldə etmiş 5 bank - Azərbaycan Beynəlxalq Bankı, Kapital Bank, PAŞA Bank, Bank Respublika və AGBank-dır.

Həmçinin, Yapı Kredi Bank Azərbaycan, Silk Vey Bank, Rabitəbank, Xalq Bank və AFB Bank ən çox qeyri-faiz gəlirləri əldə etmiş banklardır.

Əksər bankların, xüsusilə qabaqcıl pərakəndə bankların qeyri-faiz gəlirləri 2016-cı illə müqayisədə azalıb. Kreditlərdə komissiyaların endirməsi və ya ləğv etməsi (0% komissiya), kartlar üzrə xidmət haqlarının aşağı salınması qeyri-faiz gəlirlərinin azalmasının əsas səbəbləridir. Bir sıra banklar valyuta mübadiləsi xidmətindən əldə etdiyi gəlir hesabına qeyri-faiz gəlirlərinin bir qədər bərpa edə bilib.