Əmanətlərin Sığortalanması Fondu Azərbaycan Respublikası Xammal və Əmtəə Birjası vasitəsilə ləğv prosesindəki bir sıra bankların balansında olan əmlakın satışını davam etdirir.
FED.az birjaya istinadən xəbər verir ki, hazırda satışda, əsasən, banklara məxsus bankomatlar qalıb.
Bankomatların dəyəri 4 347 manatdan başlayır. Bankomatlar ləğv prosesində olan “Bank Standard” KB QSC-yə məxsusdur.
Eləcə də, birjada fond tərəfindən satışa təqdim edilən 157 ədəd mebel və texniki avadanlıq təklif edilir. Ümumi dəyəri 36.820,00 manat olan bu məhsullar ləğv prosesində olan“Texnikabank” ASC-nin balansında olan mebel və texnika avadanlığıdır.
Mebel və texniki avadanlıq ilkin satış qiymətindən 30% aşağı qiymətlə təklif olunur. Hərrac açıq formada 16.07.2018-ci il tarixində saat 11:00-da nəzərdə tutulub.
Qeyd edək ki, satışda Əmanətlərin Sığortalanması fondunun sifarişi ilə bir mənzil də var. Mənzilin (60.3 kv.m ümumi sahə, 3 otaq, təmirolunma vəziyyəti orta təmirli) ilkin dəyəri 70.080,00 manatdır.
Daşınmaz əmlak ləğv prosesində olan“Kredobank” ASC-nin kredit təminatı qismində balansa götürülmüş əmlakdır. Bununla bağlı hərrac açıq formada 09.07.2018-ci il tarixində saat 11:00- da keçiriləcək.
“Bank of Azerbaijan” ASC-nın balansında olan 60 ədəd “Verifone VX680” markalı POS-terminalın kompleks satışı üzrə hərrac 30.07.2018-ci il tarixində olacaq. Post terminallar üçün minimum təklid 7.183 manatdır.
