Azərbaycanın bank sektorunun ən fəal iştirakçılarından olan, ölkənin 5-ci böyük bankı «Bank Respublika» 2022-ci ili ciddi nəticələr və tarixi rekordla başa vurub.
“Bank Respublika”dan - TARİXİ REKORD!
«Bank Respublika tarixinin ən yüksək nəticələrini əldə edib. Buna görə komandamıza, bütün müştərilərimizə və partnyorlarımıza dərin təşəkkürümü bildirmək istərdim!» - Azərbaycan bank sektorunun top-menecerlərindən biri, bankın Müşahidə Şurasının sədri Şakir Rəhimovun açıqlaması bankdakı irəliləyişin miqyaslarını nümayiş etdirir.
FED.az biznes və maliyyə xəbərləri portalı «Bank Respublika»nın açıqladığı hesabatlara istinadən xəbər verir ki, 2022-ci ildə bankın faiz gəlirləri 48 milyon manat və ya 53% artaraq ötənilki 90,8 milyon manatdan 138,6 milyon manata yüksəlib.
Bu dövrdə bankın kredit portfelinin faiz gəlirləri 129,6 milyon manat olub (44 milyon manat və ya 50% artıb).
Daha 2 milyon manat gəliri isə «Bank Respublika» qiymətli kağızlardan əldə edib.
Bunlardan başqa, «Bank Respublika» başqa banklara və maliyyə qurumlarına verilən kreditlərdən 1,6 milyon manat əldə edib, başqa banklarda yerləşdirilən depozitlər isə banka 2,7 milyon manat gəlir gətirib (100 dəfə artıb).
Bankın faiz xərcləri də ciddi artıb – təqribən 20 milyon maat və ya 58% artaraq 53,8 milyon manata çatıb.
2022-ci ildə «Bank Respublika»da əmanəti olanlara 25,7 milyon manat faiz ödənilib. Ötənilki göstərici ilə müqayisədə 7 milyon manat artıqdır. Bundan başqa, «Bank Respublika» cəlb etdiyi kreditlərə görə 17 milyon manat faiz ödəyib (2021-ci ildə 13 milyon manat olmuşdu). Bankın qiymətli kağızlar üzrə xərcləri 5,1 milyon manat, digər faiz xərcləri isə 5,8 milyon manat olub.
Nəticədə ilin sonuna «Bank Respublika»ın xalis faiz gəlirləri 85 milyon manata yaxınlaşıb, bu əvvəlki illə müqayisədə 28 milyon manat və ya 54% artıqdır.
2022-ci ildə «Bank Respublika»nın qeyri-faiz gəlirləri rekord vurub – 16 milyon manat və ya 70% artımdan sonra 39 milyon manata çatıb.
Bankın haqq və komissiya gəlirləri də təqribən 50% artaraq 16,6 milyon manatdan 23,8 milyon manata yüksəlib.
«Bank Respublika» xarici valyutalarla əməliyyatlardan gəlirlərini 2,5 dəfə artıraraq 15,5 milyon manata yüksəldib.
2022-ci ildə «Bank Respublika»nın qeyri-faiz xərcləri 25 milyon manat və ya təqribən 40% artaraq 65,8 milyon manatdan 90,7 milyon manata yüksəlib.
Artımın əsas hissəsi – 14 milyon manatı əmək haqqı xərcləri ilə bağlıdır – 2022-ci ildə «Bank Respublika» öz əməkdaşlarına 50 milyon manatdan artıq əmək haqqı ödəyib ki, bu da 2021-ci illə müqayisədə 40% artıqdır.
Bankın ümumi və inzibati xərcləri 10 milyon manat artaraq 23 milyon manata, digər xərcləri 14,4 milyon manat olub.
Beləliklə, bank 2022-ci ili 33,3 milyon manat əməliyyat mənfəəti ilə tamamlayıb. Üstəlik indiyədək ayrılmış ehtiyatlardan 2,8 milyon manat geri qaytarılıb. Nəticədə bankın mənfəət vergisindən əvvəlki mənfəəti 36 milyon manata yüksəlib.
9,4 milyon manat mənfəət vergisi ödənildikdən sonra isə 2022-ci ildə «Bank Respublika»nın xalis mənfəəti 26,6 milyon manat olub.
Bu ötənilki göstəricidən 7,1 milyon manat artıqdır. xatırladaq ki, 2021-ci ilin sonuna «Bank Respublika»nın xalis mənfəəti 19,5 milyon manat olmuşdu.
2022-ci ildə «Bank Respublika»nın aktivləri 353 milyon manat və ya 29% artaraq 1 milyard 585 milyon manata yüksəlib. Bu bankın tarixində rekord göstəricidir.
Özü də «Bank Respublika»nın aktivlərinin artımı böyük hissəsi nağd vəsaitlərin deyil, kreditlərin artımı hesabına baş verib.
Daha bir rekord kreit portfelində qeydə alınıb - 2022-ci ildə Bankın kredit portfeli 242 milyon manat (33%) artaraq 962 milyon manatı keçib.
Bankın nağd vəsaitlər cəmi 24 milyon manat artaraq 320 milyon manatı keçib.
Bankın qiymətli kağızlara yatırımları da 24 milyon manat artaraq 64 milyona yüksəlib.
2022-ci ildə «Bank respublika» başqa banklardakı depozitlərini 50%-dən çox artıraraq 90 milyon manatdan 137 milyon manata çatdırıb.
Kredit portfeli 1 milyard manata yaxınlaşıb
Qeyd edildiyi kimi, 2022-ci ilin sonunda «Bank Respublika»nın kredit portfeli rekord vuraraq 962 milyon manatı keçib.
Bu dinamika ilə artıq 2023-cü ilin 1-ci rübündə bankın kredit portfeli 1 milyard manatı keçə bilər.
Kredit portfelinin böyük hissəsi – 658 milyon manatı və ya 70%-ə yaxın biznes kreditlərinin payına düşüb. Ötən il bankın biznes kreditləri 141 milyon manat və ya 27% artıb.
Bankın istehlak kreditləri isə 87 milyon manat artaraq 140 milyon manatdan 227 milyon manata yüksəlib.
Bu dövrdə bankın daşınmaz əmlak kreditləri 14 milyon manat artaraq 76 milyon manatı keçib.
Yeri gəlmişkən, «Bank Respublika» ölkədə kredit portfeli ən «təmiz» olan banklardandır – 962 milyon manatlıq kredit poğrtfelinin cəmi 6 milyon manatı ehtiyata ayrılıb.
2022-ci ildə «Bank Respublika»nın 335 milyon manat artaraq 1 milyard 466 milyon manata yüksəlib.
Bankın depozit portfeli 20% artaraq 965 milyon manatı keçib. Bankda fiziki şəxslərin depozitləri 40%-ə yaxın artaraq 558 milyon manata çatıb. Hüquqi şəxslərin əmanəti isə 407 milyon manata yüksəlib.
2022-ci ilin sonuna «Bank Respublika»nın başqa maliyyə qurumları qarşısında öhdəlikləri 378 milyon manat olub. Daha 45 milyon maat həcmində öhdəlik istiqrazlara görə yaranıb.
İlin sonuna bankın kapitalı 118,5 milyon manata yüksəlib – bir il əvvəllə müqayisədə 18 milyon manat artıb.
Bunun 73 milyon manatını səhmdər kapital təşkil edir – 24 milyon bölüşdürülməmiş mənfəət, 21 milyon manat isə ümumi ehtiyatlardır.
