"Bank Melli İran" Bakı filialı 2021-ci ilin ilk 6 ayını 575 min 159 manat xalis mənfəət ilə başa vurub. Bu, ötən ilin eyni dövrü ilə müqayisədə 25% çoxdur. Filial ötən ilin ilk 6 ayını 460 min 875 manat xalis mənfəət ilə bağlamışdı.
Eləcə də bax: Azərbaycanda ən çox və ən az işçisi olan banklar - BANKLAR, SİYAHI
FED.az xəbər verir ki, "Bank Melli İran" Bakı filialının 2020-ci ilin yanvar-iyun dövründə faiz gəlirləri 1 milyon 281 min 633 manat ikən, 2021-ci ilin eyni dövründə 1 milyon 703 min 486 manat təşkil edib (421 min 853 manat və ya 33% artıb).
Bankın haqq və komissiya gəlirləri 69 min 890 manatdan 86 202 manata yüksəlib.
MÜŞTƏRİLƏRƏ VERİLƏN KREDİTLƏR ARTIB
Ötən ilin sonu ilə müqayisədə filialın müştərilərə verdiyi kreditlər 2 milyon 958 min manat və ya 56,6% artaraq 30 İyun 2021-ci il tarixində 8 milyon 179 min manata çatıb. Ötən ilin sonunda "Bank Melli İran" Bakı filialının kredit portfeli 5 milyon 222 min manata çatmışdı.
Həmçinin, 30 İyun 2021-ci il tarixində filialın 90 milyon 641 min manat cəmi aktivlərinin 49 milyon 557 min manatı nağd vəsaitlər, 24 milyon 554 min manatını ticarət üçün alınmış qiymətli kağızlar təşkil edib. Ötən ilin sonunda bankın aktivləri 93 milyon 699 min manat o cümlədən nağd vəsaitlər 55 milyon 386 min manat, ticarət üçün alınmış qiymətli kağızlar 22 milyon 430 manat təşkil etmişdi.
30 İyun 2021-ci il tarixində "Bank Melli İran" Bakı filialı 37 milyon 953 min manat cəmi kapitala malik olub.(Marja)
