Türkiyədə fəaliyyət göstərən “Yapı Kredi” 2018-ci ildə 4 milyard 668 milyon lirə (1 milyard 500 milyon manat) xalis mənfəət əldə etdiyini açıqlayıb. Bu, 2017-ci illə müqayisədə 29% çoxdur. Bank 2017-ci ili 3 milyard 614 milyon lirə xalis mənfəət ilə bağlamışdı.
FED.az "Yapı Kredi"dən verilən məlumata istinadən xəbər verir ki, 2018-ci ildə Bankın müştərilərə verdiyi kreditlər 10 faiz artıraraq 220.5 milyon lirəyə çatıb. Ümumilikdə Bank, ölkə iqtisadiyyatına 306,3 milyard lirəlik vəsait təmin edib. Ötən il "Yapı Kredi"də əmanətlər 21% artım ilə 210,3 milyard lirəyə çatıb.
AKTİVLƏRİ 120 MİLYARD MANATDAN ÇOXDUR
2018-ci ildə "Yapı Kredi" daha da böyüyüb. Bankın aktivləri 18 faiz artım ilə 373,4 milyard lirəyə (təxminən 122 milyard manata) yüksəlib. Beləliklə, "Yapı Kredi" Türkiyənin ən böyük 3-cü özəl bankı mövqeyinə çatıb.
"Yapı Kredi"nin Baş Direktoru Gökhan Erün bildirib ki, bankın 75-ci ilinin qeyd ediləcəyi 2019-cu ilə güclü başlayıblar:
"2018-ci ildə əsas səhmdarlardan aldığımız dəstək və ölkəmizə olan sonsuz inamla sərmayə və balansımızı daha da möhkəmləndirmişik. Malik olduğumuz təcrübə və keyfiyyətli insan resursumuz ilə "Xidmətdə Sərhəd Yoxdur" anlayışı, insana və texnologiyaya sərmayə qoymaqla müştərilərimizə xidmət göstərməyə davam edirik".
AZƏRBAYCANDAKI TÖRƏMƏSİ DƏ MƏNFƏƏTLƏ İŞLƏYİR
Xəbər verdiyimiz kimi, “Yapı Kredi Bank Azərbaycan” QSC 2018-ci ili 5,3 milyon manat xalis mənfəətlə başa vurub.
“Yapı Kredi Bank Azərbaycan” QSC-nin 99,8% payla sahibi Türkiyədə fəaliyyət göstərən “Yapı ve Kredi Bankası A.Ş.”dir (Yapı Kredi). Bu bankın 81,9%-i “Koç Finansal Hizmetleri” adlı şirkətə məxsusdur, 18.1%-i isə İstanbul Birjasında ticarət olunur.“Koç Finansal Hizmetleri” şirkətinin isə 50%-i “Koç Grubu”na, 50%-i də İtaliyanın “UniCredit” qrupuna məxsusdur. Beləliklə, “Yapı Kredi Bank Azərbaycan”ın Avropanın 17 ölkəsində fəaliyyət göstərən nəhəng bankçılıq qrupunun (“UniCredit”) üzvüdür.
“Yapı Kredi” nin maliyyə göstəriciləri “Yapı Kredi Bank Azərbaycan”ın çox güclü səhmdarı olduğunu göstərir.
"Yapı Kredi", markasının dəyərinə görə, dünyanın ən böyük 500 bankından biridir.
