2026-cı il avqust ayının 1-nə banklar tərəfindən Azərbaycan regionlarına kredit qoyuluşu, o cümlədən həmin kredit məbləğlərinin orta faiz dərəcələri məlum olub.

FED.az xəbər verir ki, ən kəskin fərq Dağlıq Şirvan (20,65%) ilə Bakı (12,75%) arasındadır — təxminən 8 faiz. Bu o deməkdir ki, Dağlıq Şirvanda kreditlərin orta faizi Bakıdan təxminən 62% yüksəkdir.

Digər diqqətçəkən məqam kreditlərin böyük hissəsinin Bakıda toplanmasıdır - 24,46 milyard manat, yəni ölkə üzrə 32,10 milyard manatlıq kreditlərin təxminən 76%-i Bakının payına düşür. Bakıdan kənardakı bütün iqtisadi rayonların birlikdə payı isə təxminən 24%-dir.

Faiz baxımından ən bahalı ilk beşlik Dağlıq Şirvan – 20,65%, Mərkəzi Aran – 20,24%, Qazax-Tovuz – 20,06%, Şirvan-Salyan – 19,84% və Lənkəran-Astara – 19,80%-dir. Ən aşağı göstəricilər isə Bakı – 12,75%, Şərqi Zəngəzur – 13,62% və Naxçıvan – 15,47%-dir.

Beləliklə kreditlərin ölkə üzrə orta faizi 14,15% olsa da, 14 iqtisadi rayondan yalnız Bakı və Şərqi Zəngəzurda kredit faizi ölkə ortalamasından aşağıdır.

Bunun səbəbi, faizi aşağı olan dövlət kreditlərinin – yəni ipoteka kreditləri (dövlət ipotekası illik 6-8%, daxili ipotekalar illik 8-13%), sahibkarlığa yardım kreitlərinin (illik 5%), eləcə də neft şirkətlərinə ayrılan dollarla aşağı faiz dərəcəli kreditlərin (illik 6-8%) daha çox Bakıda verilməsidir.

FED.az  Mərkəzi Banka istinadən həmin göstəricilər üzrə renkinqi təqdim edir.