Azərbaycanda bu ilin ikinci rübünün sonuna olan vəziyyətə görə 7 bankın faiz xərcləri 10 milyon manatdan çox artıb.
FED.az biznes və maliyyə xəbərləri portalı bu barədə bankların rüblük hesabatları əsasında hazırladığı faiz xərclərinin dinamikası üzrə renkinqə istinadən xəbər verir.
Renkinqə görə, faiz xərcləri ən çox artan bank «ABB» olub. Bankın faiz xərcləri 37,9 milyon manat (20,8%) artaraq 219,7 milyon manata çatıb.
«PAŞA Bank»ın faiz xərcləri 23,3 milyon manat (26,8%) artaraq 110 milyon manata, «Bank of Baku»nun faiz xərcləri 14,2 milyon manat (44,2%) artaraq 46,3 milyon manata, «Unibank»ın faiz xərcləri 14 milyon manat (29,8%) artaraq 61,1 milyon manata yüksəlib.
Bundan başqa, «Ziraat Bank Azərbaycan»ın faiz xərcləri 27,3 milyon manat (12,4 milyon manat və ya 83,3% çox), «Yelobank»ın faiz xərcləri 40,6 milyon manat (11,8 milyon manat və ya 41,1% çox) və «Rabitəbank»ın faiz xərcləri 36 milyon manat (11 milyon manat və ya 44,1% çox) təşkil edib.
Bəhs olunan dövrdə Azərbaycanda 12 bankın faiz xərcləri 10 milyon manata qədər artıb, bir bankın – «Kapital Bank»ın faiz xərcləri 20,2 milyon manat (10,9%) azalıb.
