"AccessBank" 1 iyun - Uşaqların Beynəlxalq Müdafiəsi gününə həsr olunan konsert təşkil edib.
Xalq artisti Fidan Hacıyevanın Vokal Musiqi Məktəbinin azyaşlı tələbələri və "Uşaqların Sağlam Gələcəyi" İctimai Birliyində reabilitasiya keçən xüsusi qayğıya ehtiyacı olan uşaqlar eyni səhnəni paylaşıb.
Olduqca böyük maraqla qarşılanan konsertin keçirildiyi Dövlət Akademik filarmoniyasının Kamera və orqan musiqisi zalında boş yer yox idi. Tamaşaçılar arasında tanınmış incəsənət xadimləri, ictimaiyyət və media nümayəndələri də yer almışdı.
AccessBank-ın Marketinq və Korporativ bankçılıq icraçı direktoru Günay Cəlilova: "Ənənəvi olaraq, AccessBank Beynəlxalq uşaqların müdafiəsi günündə balacaları sevindirdi. Bu layihənin reallaşdırmasında əsas məqsədimiz xüsusi qayğıya ehtiyacı olan uşaqların cəmiyyətə inteqrasiyasına az da olsa dəstək olmaq idi. İnanıram ki, bu cür layihələri sayı çox olduqca, daha sağlam və gözəl gələcəyə nail ola biləcəyik. Konsertin həyata keçirilməsində bizə verdiyi dəstək üçün Fidan xanım Hacıyevaya xüsusi təşəkkür edirik. AccessBank olaraq uşaqların səsinə səs verməkdən qürur duyuruq".
Xalq artisti Fidan Hacıyeva: "İlk növbədə bu gözəl təşəbbüsə görə AccessBank-a təşəkkür etmək istərdim. İnanıram ki, bu cür layihələrə digər təşkilatlar da qoşulacaq və bu uşaqların cəmiyyətdə layiqli yerini tutması üçün dəstək olacaq. Onlar bizim gələcəyimizdir və biz birgə sağlam və xoşbəxt gələcəyimiz üçün çalışmalıyıq".
