20 aprel 2023-cü il tarixində Macarıstanın Budapeşt şəhərində illik təşkil edilən sayca 45-ci BACEE Bankçılıq Konfransı keçirilmişdir.
Azərbaycan və Macarıstanın Banklar Assosiasiyaları – ƏMƏKDAŞLIĞA BAŞLAYIR
FED.az xəbər verir ki, bank sektoru ilə bağlı gündəm mövzuların müzakirə olunduğu konfransda Azərbaycan Banklar Assosiasiyasının (ABA) prezidenti Zakir Nuriyev və icraçı direktoru Yunus Abdulov da iştirak etmişdir.
Konfransda Macarıstanın bank sektoru ilə bağlı mövcud vəziyyət, qlobal bank sektorundakı qeyri-müəyyənliklərin Mərkəzi və Şərqi Avropa, Cənubi-Şərqi Avropa ölkələrinə təsirləri, rəqəmsal bankçılıq, ödənişlər, açıq bankçılıq, dünya ölkələrinin milli valyutalarının rəqəmsal analoqunun (Central Bank Digital Currency, CBDC) yaradılması, rəqəmsal transformasiya, maliyyə sektorunda artırılmış reallığın (AR) tətbiqi və s. kimi mövzular müzakirə edilmişdir.
Tədbirdə Macarıstan və Avstriya Mərkəzi Bankı, Macarıstan Banklar Assosiasiyası, Mərkəzi və Şərqi Avropa ölkələri üzrə Banklar Assosiasiyasının rəhbər heyəti, “Raiffeisen Bank International AG”, “CIB Bank”, “Erste Bank Macarıstan”, “Bank Transilvaniya Rumıniya”, “MKB Bank Nyrt.”, “KT Bank” və s. kimi bankların rəhbərləri və müvafiq nümayəndələri, eləcə də müxtəlif şirkətlər iştirak etmişdir.
ABA nümayəndə heyəti tədbir çərçivəsində əlaqədar banklarla müxbir münasibətlərin inkişafı və digər sahələrdə əməkdaşlıq imkanlarına dair müzakirələr aparmışlar.
Əlavə edək ki, konfransın sonunda əməkdaşlığa görə mükafatlandırma mərasimi baş tutmuşdur və ABA da tərəfdaşlığa görə mükafata layiq görülmüşdür. Mükafat Yunus Abdulova təqdim edilmişdir.
Qeyd edək ki, ABA 1990-cı ildə kommersiya bankları tərəfindən təsis edilib. ABA-nın əsas məqsədi üzv-təşkilatları təmsil etmək, onların müxtəlif növ işgüzar xidmətlərə olan ehtiyaclarının ödənilməsinə dəstək göstərmək və fəaliyyətlərini əlaqələndirməkdən ibarətdir. Hazırda 25 bank və 5 qeyri-bank təşkilatı ABA-nın üzvüdür.
