Avropa Parlamenti 2035-ci ildən etibarən Avropa İttifaqı ərazisində benzin və dizel yanacağı ilə işləyən avtomobillərin satışını qadağan edən təklifi təsdiqləyib. Həmin ildən satışa çıxarılacaq bütün yeni avtomobillər ekoloji tələblərə tam cavab verməlidir.
Avropa Parlamenti 2035-ci ildən benzinlə işləyən avtomobillərin satışını - QADAĞAN EDİB
FED.az xəbər verir ki, Ekologiya və Təbii Sərvətlər Nazirliyindən də bildirilib ki, hazırda ölkəmizdə nəqliyyat vasitələrinin atmosferə vurduğu zərərin azalıdılması istiqamətində işlər aparılır. Bu tədbirlər isə əsasən təşviqedici xarakter daşıyır.
Ekologiya və təbii sərvətlər nazirinin müşaviri Rasim Səttarzadə deyib ki, burada əsas məqsəd hibrid və elektomobillərə keçidi sürətləndirməkdir. Köhnə avtomobillərin istismardan çıxarılması üçün isə digər işlər görülür.
Nəqliyyat məsələləri üzrə ekspert Yasin Mustafayevin fikrincə, Avropa Parlamentinin qərarı Azərbaycanın avtomobil bazarına da təsirsiz ötüşməyəcək. Ancaq hazırda bu məsələ yerli bazarda hər hansı narahatlıq yaratmır.
Ekspert deyib ki, elektromobillərin vergi və gömrük rüsumlarından azad edilməsi ölkəmizdə onların sayının artmasına şərait yaradıb. Ancaq belə nəqliyyat vasitələrinin istehsalı az olduğuna görə qiymətləri kifayət qədər yüksəkdir.
Eksperti hesab edir ki, Azərbaycanda da 2035-2040-cı illərə qədər elektromobillərə keçidi yekunlaşdırmaq mümkündür. (Xezerxeber.az)
