İqtisadiyyat Nazirliyi yanında Əmlak Məsələləri Dövlət Xidməti tərəfindən dövlət əmlakının özəlləşdirilməsinin sürətləndirilməsi və idarə edilməsinin səmərəliliyinin artırılması məqsədilə hərracların təşkil olunması davam etdirilir.

Eləcə də bax: Ekoloji təmiz avtomobillərin idxal rüsumundan azad edilməsi üçün hökumətə - TƏKLİF VERİLİB

FED.az xəbər verir ki, dövlət əmlakının özəlləşdirilməsi ilə bağlı keçirilən növbəti hərracda 1 yarımçıq tikili, 14 nəqliyyat vasitəsi özəlləşdirilib. Dövlət əmlaklarına ümumilikdə 40 sifariş qəbul olunub ki, bunun 11-i elektron qaydada həyata keçirilib.

Ötən hərraclarda olduğu kimi, bu dəfə də nəqliyyat vasitələrinin özəlləşdirilməsinə maraq böyük olub və hərrac rəqabətli keçib. Belə ki, ilkin satış qiyməti 8.500 “HOWO” markalı yük avtomobilinə edilən ən son təklif 12.000 manatadək yüksəlib. Bundan başqa, “BMW” markalı nəqliyyat vasitəsinin ilkin start qiyməti 2.500 manat olsa da, nəqliyyat vasitəsi 3.650 manata özəlləşdirilib.

Özəlləşdirilən yarımçıq tikili isə İsmayıllı rayonunda yerləşir.

Budəfəki hərracda satılmış dövlət əmlakları üzrə 251.200 manat vəsaitin dövlət büdcəsinə ödənilməsi nəzərdə tutulur.

Hərracda özəlləşdirilən dövlət əmlakının siyahısı ilə buradan tanış olmaq mümkündür: (https://bit.ly/3Omt9Tp )

Məlumat üçün bildiririk ki, aprel ayı üzrə daha 2 hərrac keçiriləcək.

Hər kəs Xidmətin rəsmi saytından (emlak.gov.az) və ya Özəlləşdirmə portalından (privatization.az) hərraca çıxarılan dövlət əmlakı üzrə seçim edə bilər. Elektron Xidmətlər Portalından (e-emlak.gov.az) müvafiq hərrac xidmətini seçərək qeydiyyatdan keçib, dövlət əmlakının ilkin hərrac qiymətinin 10 faizi məbləğində behi ödəyib hərracda iştirakçı statusu almaq mümkündür.