Çinin «Hongqi» avtomobil şirkəti «Mercedes»in məşhur «G-Class»ına rəqib olacaq yeni avtomobil buraxır.
FED.az xəbər verir ki, həm daxili yanma mühərriki, həm də elektriklə işləyən maşın 843 at gücündədir.
Avtomobilin uzunluğu 5 metrdən çoxdur və kapotunun altında 2,0 litrlik mühərrik var.
Yeni «Hongqi G919» çərçivəli SUV-un fotoşəkilləri və ilk texniki detalları Çin Sənaye və İnformasiya Texnologiyaları Nazirliyinin məlumat bazasında açıqlanıb. Bu böyük SUV digərlərindən fərqli olaraq «qutu» dizaynına malikdir, lakin Hongqi-nin imza elementlərini və Çin brendinin fərqli xüsusiyyətlərini qoruyub saxlayır.
Avtomobil gücləndirilmiş bamperlər, dartma gözləri, dam dayağı, köməkçi işıqlandırma və AT yolsuzluq avtomobilləri üçün təkərlərlə təchiz olunub. Avtomobilin damında isə lidar sistemi quraşdırılıb. Maşının ölçüləri 5135 x 2050 x 1950 mm, təkər bazası isə 2900 mm-dir və bu da G919-u brendin model sırasındakı ən böyük avtomobillərdən birinə çevirir.
Avtomobilin güc aqreqatı hibriddir. O, generator kimi fəaliyyət göstərən 218 at gücünə malik 2,0 litrlik turbomühərrikdən və dörd elektrik mühərrikindən ibarətdir. Birləşdirilmiş sistem gücü 843 at gücünə, maksimal fırlanma anı isə təsirli 1320 Nm-ə bərabərdir. Dartma batareyasının tutumu 64,1 kVt/saat, tam elektrikli yürüş isə 220 km-dir. «Hongqi G919» hava asqısı və mexaniki kilidlənən ön və arxa differensiallara malikdir.
Hələlik yeni SUV-un qiyməti açıqlanmayıb, rəsmi premyerası tezliklə gözlənilir.
