İyul ayında Avropada avtomobil satışları artıb, Çinin BYD şirkəti isə bazar payında Tesla-nı geridə qoyub. İyul ayında BYD-nin bazar payı 1,2 faizə yüksəldiyi halda, Tesla-nın bazar payı 0,8 faizə düşüb.
FED.az xəbər verir ki, iyul ayında Avropada avtomobil satışları yüzdə 5,9 artarkən, Çinin BYD şirkətinin bazar payının artması diqqət çəkib. İyulda Almaniyada satışlar artsa da, Böyük Britaniya, Fransa və İtaliyada azalıb.
Avropa Avtomobil İstehsalçıları Assosiasiyasının (ACEA) məlumatına görə, iyul ayında Avropa İttifaqı, Avropa Azad Ticarət Assosiasiyası (EFTA) və Böyük Britaniyada yeni avtomobil satışları 1,09 milyon ədədə yüksəlib.
Ümumiyyətlə elektrik maşınlarının satışları artsa da, satışları 40,2% azalan Tesla, ardıcıl yeddinci aydır ki, bazar payını itirməkdədir. Çinli rəqib BYD Teslanı qabaqlayıb.
BYD-nin satışları elə kəskin artıb ki. onu ilk dəfə olaraq aylıq satış hesabatına daxil ediblərö. Son bir ayda BYD-nin satışları keçən illə müqayisədə 225,3 faiz artıb, bazar payı isə iyul ayında 1,2 faizə çatıb. Tesla-nın bazar payı isə keçən il 1,4 faizdən 0,8 faizə düşüb.
Avropa şirkətləri də özlərinə gəlirlər - ötən illə müqayisədə Volkswagen-in satışları 11,6 faiz, Renault-nun isə 8,8 faiz artdığı halda, Stellantis-in satışları 1,1 faiz azalıb.
Təkcə Avropa İttifaqında ümumi avtomobil satışları 7,4 faiz artıb. Tam elektriklə işləyən avtomobillərin satışı 39,1 faiz, hibridlərin (HEV) 56,9 faiz, plug-in hibridlərin (PHEVs) isə 14,3 faiz artıb.
ACEA-nın məlumatlarına görə, iyunda Avropada minik avtomobilləri satışlarının 59,8 faizini hibrid və elektrik avtomobilləri təşkil edib, keçən ilin eyni dövründə isə bu rəqəm 51,1 faiz təşkil edirdi.
Volkswagen kimi avropalı avtomobil istehsalçıları, Avropada elektrikli avtomobillərin satışını təşviq edən qaydalara riayət etməklə yanaşı, onlara Çin şirkətləri ilə rəqabət aparmağa imkan verəcək yeni müəssisələrin yaradılması üzərində işləyirlər.
