Sənaye sahəsində rəqabətqabiliyyətli və ixracyönümlü məhsul istehsalının təşviqi, innovasiyalara əsaslanan yeni müəssisələrin qurulması və uğurların artırılması üçün 2022-ci il muxtar respublikada “Sənaye ili” elan edilib. Bu istiqamətdə həyata keçirilən uğurlu layihələrdən biri də elektrikli avtomobillərin Naxçıvan şəhərinə gətirilməsi və onların Naxçıvan Avtomobil Zavodunda istehsal şəraitinin yaradılması yolunda atılan addımlardır.
Eləcə də bax: Naxçıvanda elektromobil istehsalına - BAŞLANIR
FED.az xəbər verir ki, “Cahan” Holdinq KŞİ-nin Mətbut Xidmətinin yaydığı məlumatda bildirilir ki, Dünyanın nəhəng avtomobil müəssisələrinin müxtəliftəyinatlı və modellərdəki nümunələrinin muxtar respublikada istehsal olunması, Naxçıvanda maşınqayırma sənayesinin güclənməsinə, eləcə də iqtisadiyyatın inkişafına öz töhfəsini verir. Zavodun qarşısında yeni hədəflər var. Avtomobil sektorunda olan inkişafla ayaqlaşmaq məqsədilə günümüzdə tələbatı artmaqda olan elektrikli avtomobillərin istehsalına başlanılacaq. Yüksək keyfiyyətli elektrikli avtomobillərin istehsalı üçün ilkin addımlar artıq atılıb, layihə üzərində işlərin təməli qoyulub. Belə ki, iyunun 13-də Birləşmiş Ərəb Əmirliyinin Dubay şəhərində, Habtoor Palace otelində “Cahan” Holdinqin KŞİ-nin Prezidenti Vüqar Abbasov və onu müşayiət edən nümayəndə heyəti ilə Çin Lifan şirkətinin Baş icraçı direktoru Danfer Deng və Çin Lifan şirkətinin Regional direktoru Çan Kayın nümayəndə heyəti arasında görüş keçirilmişdir.
Görüşdə “Cahan” Holdinq KŞİ tərəfindən qurumun vitse-prezidenti Pərviz Abbasov, “Cahan” Holdinq KŞİ Birləşmiş Ərəb Əmirliyi ofisinin rəhbəri Rasim Məmmədov, “Cahan” Motors MMC-nin direktoru Adil Axundov, Naxçıvan Avtomobil Zavodunun icracı direktoru Səxavət Hümbətov iştirak etmişlər.
Görüş zamanı Naxçıvan Avtomobil Zavodunda elektrikli avtomobillərin istehsalı üçün yenidənqurma və infrastrukturun yaradılması şəraitinin şərtləri müzakirə edilmiş, yaxın gələcəkdə 2 növ elektrikli və 1 növ yanacaqla işləyən avtomobillərin Naxçıvan Avtomobil Zavodunda istehsalı üçün razılıq əldə olunaraq anlaşma protokolu imzalanmışdır.
Danışıqlar zamanı Çin Lifan şirkətinin Regional direktoru Çan Kayın Naxçıvana gəlişi, Naxçıvan Avtomobil Zavodunda ediləcək dəyişikliklər və lazımı infrastrkturun qurulması üçün layihələr hazırlanması planlaşdırılmışdır.
Görüşün sonunda qarşılıqlı xatirə hədiyyələri təqdim edilmişdir.
