Lənkəranın bir çox kəndində açıq sahələrdə çiyələk əkininə üstünlük verilir. Fermerlərin sözlərinə görə, açıq sahədə əkilən çiyələk iqlimə tam uyğundur. Mayın əvvəlindən ilk yığıma başlanılıb. Ötən illə müqayisədə məhsul bol olacaq.
Gəlirli sahədir, məhsulu sahədən topdan alırlar - KİLOQRAMI 2,5 MANATDIR
FED.az xəbər verir ki, Lənkəranda ilbəil çiyələyin əkin sahələri genişləndirilir. Cənub rayonlarında daha çox çiyələyin “Albion”, “Murano”, “Kler” növləri yetişdirilir. Bu növlər həm yerli iqlimə tez uyğunlaşır, həm də məhsuldarlığı ilə fərqlənir.
Fermer Şahin Mirzəyev rayonun Xarxatan kəndində 15 hektar ərazidə çiyələk sahəsi salıb. O, çiyələyin “Murano” və “Kler” sortlarının əkininə üstünlük verib: “Açıq sahədə məhsul yığımına başlamışıq. Çox gözəl bar verib. Əkdiyimiz çiyələklər həm dadına, həm də keyfiyyətinə görə seçilir. Uzaq məsafəyə göndərmək üçün əlverişlidir və dözümlüdür. Dövlət subsidiyası ilə götürdüyümüz texnikalardan istifadə edirik. Gələcəkdə məhsuldarlığı artırmaq məqsədilə daha geniş ərazilərdə əkin aparmaq fikrimiz var. Məhsullarımızı MDB ölkələrinə, o cümlədən Rusiyaya ixrac etməyi düşünürük”.
Çiyələk həssas bitki olduğundan, yaxşı qulluq tələb edir. Aqrotexniki qaydalara düzgün əməl etməklə yüksək məhsuldarlığa nail olmaq mümkündür. Təsərrüfatın baş aqronomu Mikayıl Sadıqov deyir ki, sentyabrda əkilən çiyələk şitilləri may ayında məhsul verməyə başlayır. Yaxşı qulluq göstərilən sahənin hər hektarından 70 ton məhsul götürmək mümkündür: “Xəstəlik və zərərvericilərə qarşı vaxtında mübarizənin aparılması yüksək məhsuldarlıq üçün əsas şərtdir. Çiyələyi sentyabr ayında əkmişik, artıq ilkin yığıma başlamışıq. Ümumiyyətlə, təsərrüfatda bir hektardan 50-60 ton məhsul gözlənilir”.
Hazırda kredit və dövlət subsidiyası hesabına çiyələk sahələri genişləndirilir. Ötən il əkilən şitillərin 4-5 aylıq qulluqdan sonra hektara 50-60 ton məhsul verəcəyi proqnozlaşdırılır.
Qeyd edək ki, bu il Lənkəranda 200 hektara yaxın sahədə çiyələk əkilib. Gələn il bu sahələrin artırılması nəzərdə tutulur. (Azərtac)
