Azərbaycanın bank sektorunda problemli istehlak kreditlərinin həcmi (QİK) avqustun 1-nə 311,6 milyon manat təşkil edib. Bu sahədə son bir ayda azalma qeydə alınsa da, illik müqayisədə kəskin artım davam edir.
FED.az Mərkəzi Bankın statistikasına istinadən xəbər verir ki, bu, ötən ilin eyni dövrü ilə müqayisədə 72,1 milyon manat və ya 30,1% artım deməkdir. Belə ki, ötən ilin avqustun 1-nə vaxtı keçmiş istehlak kreditlərinin həcmi 239,5 milyon manat idi.
Portfelin digər dövrlər üzrə dinamikası da diqqət çəkir. Ötən ilin sonuna (246,3 mln. manat) nəzərən problemli kreditlər 65,3 milyon manat (26,5%) artıb. Lakin son bir ayda (iyula nəzərən) portfeldə 9,4 milyon manat (2,9%) azalma baş verib.
Xatırladaq ki, problemli istehlak kreditləri portfeli ötən ilin eyni dövründə 239,5 milyon manat, ötən ilin sonunda 246,3 milyon manat, bu ilin iyulun 1-də isə 321 milyon manat idi.
Vaxtı keçmiş kreditlərin ümumi istehlak kreditləri portfelindəki payı isə avqustun 1-nə 3,5% təşkil edib. Bu, ötən ilin eyni dövrü (3,1%) ilə müqayisədə 0,4 faiz bəndi artım deməkdir. İlin əvvəlindən bəri (2,9%) isə portfeldəki pay 0,6 faiz bəndi pisləşib. Maraqlıdır ki, məbləğdəki aylıq azalmaya paralel olaraq, portfeldəki pay da 0,1 faiz bəndi yaxşılaşıb.
