2023-cü ilin yanvar-avqust ayları ərzində fiziki şəxs olan istehlakçılar tərəfindən ölkə ərazisində pərakəndə ticarət, ictimai iaşə və tibb fəaliyyəti göstərən şəxslərdən alınmış mallara və göstərilən xidmətlərə görə ödənilmiş ƏDV-nin 99,7 milyon manatı geri qaytarılıb.
Azərbaycanda yaşayış və qeyri-yaşayış sahələrinə görə 17 milyon manat ƏDV məbləği geri qaytarılıb - VİDEO
FED.az bu barədə İqtisadiyyat Nazirliyi yanında Dövlət Vergi Xidmətinə istinadən xəbər verir.
Qaytarılmış vəsaitin 70,3 faizi nağdsız, 29,7 faizi isə nağd qaydada alınmış mallara görə ödənilmiş ƏDV məbləğidir.
Bu günədək alınmış mallara görə ödənilmiş ƏDV-nin bir hissəsinin qaytarılması üçün “edvgerial.az” portalında 2,4 milyona yaxın istifadəçi qeydə alınıb. “ƏDV geri al” layihəsinin tətbiq edildiyi vaxtdan 2023-ci ilin 1 sentyabr tarixinədək portalda qeydiyyatdan keçmiş istehlakçılara ümumilikdə 1 milyarddan çox kassa çeki üzrə 461,2 milyon manat ƏDV məbləği geri qaytarılıb.
İndiyədək Dövlət Vergi Xidməti tərəfindən ölkə ərazisində 93 min ədəd yeni nəsil nəzarət-kassa aparatı quraşdırılıb. Bu tip aparatlardan istifadə hesablaşmaların daha şəffaf aparılmasına, malların qanunsuz dövriyyəsinin qarşısının alınmasına və dövriyyəyə nəzarətin təmin edilməsinə imkan yaradıb. 2023-cü ilin yanvar-avqust ayları ərzində yeni nəsil NKA-lar vasitəsilə qeydə alınan dövriyyə 14,3 milyard manatdan çox olub ki, bu da ötən ilin müvafiq dövrü ilə müqayisədə 16 faiz çoxdur.
