Azərbaycan Kredit Bürosu (Büro) Findoc.az portalında yeni xidmətini - Bildirişlər xidmətini istifadəyə vermişdir. Müvafiq xidmət vasitəsilə vətəndaşlar öz kredit tarixçələrində əks olunan gecikmə günləri ilə bağlı bildirişi anında əldə edə biləcəklər.
Xidmət Findoc istifadəçilərinə kreditlər üzrə cari ay ərzində məlumat təchizatçıları tərəfindən təqdim edilmiş gecikmə günləri ilə bağlı bildirişlərin əldə edilməsini əhatə edir.
Bildiriş xidmətinin məqsədi vətəndaşı kredit tarixçəsində baş verən gecikmələrlə bağlı anında xəbərdar etmək və kredit hesabatını daim nəzarətdə saxlamağa imkan yaratmaqdır.
Xidmət ödənişsiz əsaslarla yalnız Findoc-da qeydiyyatdan keçmiş şəxslərə təqdim edilir və hər bir istifadəçi üçün avtomatik aktivləşdirilir. Xidməti dayandırmaq üçün də istifadəçilərə əlavə imkan yaradılmışdır. Bunun üçün Findoc portalının "Tənzimləmələr" bölməsinə keçid edərək müvafiq funksionallığı söndürmək və ya yenidən aktivləşdirmək mümkündür.
Xatırladırıq ki, hər bir istifadəçi öz kredit hesabatını il ərzində iki dəfə tam ödənişsiz əldə edə bilər.
Hazırda Findoc portalında qeydiyyatdan keçmiş şəxslərin sayı 50 mindən artıqdır.
Findoc portalından məsafədən qeydiyyatdan keçmək üçün https://findoc.az/ linkindən istifadə edilir.
Portal real-vaxt rejimində, 7/24 əsaslarla fəaliyyət göstərir.
Büro 15 yanvar 2018-ci il tarixində yaradılmışdır. Büro müştərilərin kredit tarixçəsini təşkil edən məlumatları kredit təşkilatları ilə yanaşı daha geniş mənbələrdən, o cümlədən lizinq, sığorta, kommunal xidmətlər göstərən müəssisələrdən, nisyə mal alqı-satqısı həyata keçirən şirkətlərdən, habelə borc öhdəliyi ilə bağlı digər məlumat bazalarından toplanılması, saxlanılması, təhlili, kredit hesabatlarının formalaşdırılması, borcalanlara fərdi reytinqlərin verilməsi və digər əlavə dəyər yaradan xidmətlərin həyata keçirilməsini təmin edən qurumdur.
Hazırda Büroya qoşulmuş təşkilatların sayı 220-dən artıqdır.
