Dünən Türkiyənin vitse-prezidenti Cevdet Yılmaz investorlarla görüşdükdən sonra açıqlamalar verib. O bildirib ki, Türkiyədə sənaye üçün ayrılan torpaqlar Avropa ölkələrindən xeyli aşağıdır. Təklif olunur ki, qeyri-münbit, kənd təsərrüfatı fəaliyyətləri üçün səmərəsiz olan torpaq sahələri sənayenin planlı şəkildə genişləndirilməsi üçün ayrılmalıdır.
İmişlidə pivəlik arpa emalı zavodunun - TƏMƏLİ QOYULDU - FOTOLAR - YENİLƏNİB
FED.az xəbər verir ki, Azərbaycanın iş adamları da bildirirlər ki, ölkəmizdə də sənaye təyinatlı torpaqların çatışmazlığı problemi var, xüsusilə Bakı və Bakıətrafı ərazilərdə bu baxımdan vəziyyət çox pisdir.
Azərbaycanda istehsal və ticarət sahələrində tanınmış şirkətlərdən birinin rəhbəri (adının açıqlanmasını istəmədi) bildirdi ki, sənaye təyinatlı torpaq sahələri olmadığı üçün istehsal fəaliyyətlərini genişləndirə bilmirlər:
"Böyük şəhərlərin ətrafındakı ərazilər sənaye təyinatlı torpaqlar edirlər ki, iş adamları öz sənaye müəssisələrini yaratsınlar, iş yerləri açsınlar. Bakının ətrafında sənaye təyinatlı torpaq sahələri demək olar ki, yoxdur, hamısı kənd təsərrüfatı təyinatlı torpaqlardır. Bizim özümüzün Məhəmmədlidə torpaq sahəmiz var, istəyirik orada daha bir istehsal sahəmizi yaradaq, anbar tikək. Lakin torpaq sahələri kənd təsərrüfatı təyinatlı olduğundan sənaye üçün istifadə etməyimiz mümkün olmur. Qeyri-münbid, gölməçələrin, şirin suyun olmadığı torpaqlar kənd təsərrüfatı təyinatlıdır.
Bizim sahədə gölməçələr var idi, onları qurutmuşuq. Orada istehsal sahəmizi, anbarımızı yaratmalı olsaq 100-200 civarında yeni iş yeri yaradacağıq. Eyni zamanda, Bakıda yerləşən anbarımızın bir hissəsi buraya köçürüləcəyindən şəhərin "tıxc" probleminin həllinə kömək edəcək".
İş adamı qeyd etdi ki, Bakı ətrafında çox az sənaye təyinatlı torpaqlar olduğundan tikintiyə icazə almaq olmur:
"İqtisadiyyat Nazirliyi yanında Sahibkarlığın İnkişafı Fondundan güzəştli kredit cəlb edən zaman şərtlərdən biri bu olur ki, mütləq müəssisənin qurulacağı ərazi sənaye təyinatlı torpaq olmalıdır. Lakin belə torpaq tapmaq çox çətindir. Mən daxil, çoxlu iş adamı tanıyıram ki, bu problemə görə əlləri-qolları bağlanıb, tikinti apara bilmirlər. Əgər tikinti apara bilsək sərmayələr artacaq, valyuta Azərbaycanda qalacaq, iqtisadi artıma əlavə töhfə olacaq. Bu böyük bir problem kimi Azərbaycanda sənayenin inkişafının qarşısını alır. Bakı ətrafında torpaq sahələrinin kənd təsərrüfatı təyiantlı olması biznesə əngəldir. İş adamları məcbur qalıb qeyri-qanuni tikintilər aparırlar. Bizim böyməyimiz üçün yeni torpaq sahələri lazımdır, amma bu məsələdə böyük çətinliyimiz var. İstəyirik ki, iş adamlarının qarşılaşdığı bu ciddi problem tezliklə həll olunsun". (Marja)
