“Norm” ASC Azərbaycan Sement İstehsalçıları Assosiasiyasının (ASİA) fəal üzvü kimi ölkənin sement və beton sənayesinin karbonsuzlaşdırılması üçün əhəmiyyətli addımlar atır.

FED.az xəbər verir ki, şirkət assosiasiyanın “Xalis Sıfır Sürətləndirici” təşəbbüsünə qoşularaq, sement sənayesinin digər iştirakçıları ilə birlikdə dayanıqlı inkişaf məqsədlərini dəstəkləyən innovativ həllər üzərində işləyir. Sement və beton sənayesində karbon emissiyalarının azaldılmasını nəzərdə tutan “Xalis Sıfır Yol Xəritəsi”nin hazırlanması üçün ASİA tərəfindən təşkil olunan seminarlarda yaxından iştirak edən şirkət hökümət və özəl sektordan maraqlı tərəflərlə sıx əməkdaşlığını davam etdirir və xəritənin Qlobal Sement və Beton Assosiasiyasının (GCCA) 2050 Xalis Sıfır Yol Xəritəsi və Azərbaycanın Milli Səviyyədə Müəyyən Edilmiş Töhfələri ilə uyğunlaşdırılmasının təmin edilməsinə yaxından dəstək göstərir.  

Avropa Sement Tədqiqatı Akademiyasının (ECRA) elmi-praktik təcrübələrinə əsasən hazırlanan ASİA-nın Xalis Sıfır Yol Xəritəsi sement və beton sənayesində CO2 emissiyalarının azaldılması üçün sement istehsalında klinker faktorunun aşağı salınması, inşaat dizaynının optimizasiyası, alternativ yanacaqdan istifadə, karbonun tutulması kimi yeni texnologiyaların tətbiqinə dair istiqamətləri ehtiva edir.

ASİA üzvü kimi, “Norm” ASC-nin bu yol xəritəsini izləməsi ölkənin sement və beton sənayesinin yeni standartlarla transformasiyasını dəstəkləyir.

Qeyd edək ki, assosiasiyanın Xalis Sıfır Yol Xəritəsi təkcə Azərbaycan üçün deyil, ümumilikdə region üçün yeni model təqdim edəcək.

“Norm” ASC 10-dan çox ölkədə enerji, telekommunikasiya, yüksək texnologiyalar və tikinti sahələrində fəaliyyət göstərən beynəlxalq şirkətlər qrupu olan NEQSOL Holding-in tərkibinə daxildir.