Böyük Britaniyanın Azərbaycanda qızıl, gümüş və mis hasilatı ilə məşğul olan “Anglo Asian Mining Plc.” (AAM) şirkəti mayın 19-da Gədəbəy rayonunda yerləşən “Gilar” qızıl yatağında tammiqyaslı hasilata başladığını elan edib.
FED.az xəbər verir ki, bu barədə şirkət məlumat verir.
"Hazırda hasilat “4-cü Zona”da aparılır. Əvvəlcə filiz dore ərintisi şəklində qızılın çıxarılması üçün qələvi üsulu ilə sonra isə mis konsentratı əldə etmək üçün flotasiya metodu ilə emal ediləcək. Şirkət gündəlik təxminən 2 min ton filiz çıxarmağı planlaşdırır", - məlumatda bildirilib.
Şirkətdən vurğulanıb ki, “Gilar” “Anglo Asian Mining”in orta səviyyəli mis istehsalına keçidi kontekstində mühüm aktivdir.
Gözlənilir ki, hasilat həcmlərinin tədricən artırılmasından sonra yataqda hasilat ayda 50-60 min ton filizə çatacaq.
“Gilar”da tam miqyaslı hasilatın başlanması barədə məlumat verməkdən məmnunuq. 54 min tondan çox mis və 255 min unsiya qızıl ehtiyatları ilə “Gilar” orta səviyyəli mis istehsalına keçid strategiyamızda mühüm rol oynayacaq", - “Anglo Asian Mining”in baş direktoru Reza Veziri qeyd edib.
Daha əvvəl bildirildiyi kimi, “Gilar” yatağında ilk filizin hasilatı cari ilin mart ayında başlayıb.
"4-cü Zona”da filiz ehtiyatları 2,4 milyon ton həcmində qiymətləndirilir. Filizdə misin miqdarı 1,47 %, qızılın miqdarı isə 1,78 q/t təşkil edir.
Ümumilikdə, 2025-ci ildə AAM yataqdan təxminən 400 min ton filiz hasil etməyi nəzərdə tutur.
“Gilar” yatağı Gədəbəy müqavilə sahəsində şirkətin emal obyektlərindən təxminən 7 km məsafədə yerləşir. Yatağın JORC standartı üzrə ümumi mineral ehtiyatları 54 min ton mis və 255 min unsiya qızıl təşkil edir.
Strateji inkişaf planına əsasən, AAM 2029-cu ilə qədər orta səviyyəli çoxprofilli mis və qızıl istehsalçısına çevrilməyi planlaşdırır. Həmin vaxta qədər mis şirkətin əsas məhsulu olacaq və hasilat təxminən 50-55 min ton həcmində proqnozlaşdırılır. AAM bu artıma 2025-2029-cu illərdə “Zəfər”, “Gilar”, “Xarxar” və “Qaradağ” yataqlarında dörd yeni mədənin istismara verilməsi hesabına nail olmaq niyyətindədir.
Xatırladaq ki, hazırda “Anglo Asian Mining” “Gədəbəy” və “Qoşa” müqavilə sahələrindən qiymətli metal hasil edir. 1997-ci il avqust ayının 21-də imzalanan Production Sharing Agreement (PSA) tipli müqavilə 6 yatağın işlənməsini nəzərdə tutub. Müqavilədə Azərbaycanın payı 51 %, “Anglo Asian Mining PLC” şirkətinin payı 49 % təşkil edir. Hazırda şirkət Azərbaycanda 8 müqavilə sahəsini işləmək hüququna malikdir.(Report)
