Prezident İlham Əliyev 2019-cu il Azərbaycanın dövlət büdcəsi haqqında qanunu təsdiq edib.
“Qafqazinfo”nun məlumatına görə, 2019-cu il dövlət büdcəsinin gəlirləri 23 168 000,0 min manat, xərcləri 25 190 000,0 min manat (o cümlədən mərkəzləşdirilmiş gəlirləri 22 429 234,0 min manat, yerli gəlirləri 738 766,0 min manat, mərkəzləşdirilmiş xərcləri 24 347 188,0 min manat, yerli xərcləri 842 812,0 min manat) məbləğində təsdiq edilib.
Azərbaycan Respublikasının 2019-cu il üzrə Dövlət Büdcəsi - TAM MƏTN
2019-cu il dövlət büdcəsinə vergi daxilolmaları Vergi Məcəlləsi ilə müəyyən edilmiş vergi dərəcələrinə uyğun olaraq hesablanır.
Azərbaycanda istehsal edilən və qiymətləri tənzimlənən məhsulların ixracı zamanı məhsulların kontrakt (satış) qiyməti ilə (ixracla bağlı xərclər çıxılmaqla) ölkədaxili topdansatış qiyməti arasındakı fərqdən dövlət büdcəsinə 30 faiz həcmində yığım tutulur və bu yığımlar vergiödəyicisinin vergilər, faizlər, maliyyə sanksiyaları və inzibati cərimələr üzrə digər borclarının ödənilməsinə aid edilmir.
Azərbaycanın şəhər və rayonları üzrə gəlirlər 7 mlrd. 316 mln. manat, o cümlədən müvafiq icra hakimiyyəti orqanının müəyyən etdiyi məqsədli büdcə fonduna aid olan məbləğ 120 mln 800 min manat, yerli xərclər 842 mln. 812 min manat, gəlirlərin yerli xərclərdən artıq olan və mərkəzləşdirilmiş gəlirlərə aid edilən hissəsinin məbləği 6 mlrd. 456 mln. 434 min manat, yerli gəlir və xərcləri tənzimləmək üçün mərkəzləşdirilmiş xərclərdən ayrılması nəzərdə tutulan vəsaitin yuxarı həddi 104 mln 46 min manat məbləğində təsdiq edilib.
Dövlət büdcəsi kəsirinin yuxarı həddi 2 mlrd. 22 mln. manat məbləğində təsdiq edilib.
Azərbaycanın 2019-cu il icmal büdcəsinin xərclərinin yuxarı həddinin məbləği 27 155 796,1 min manat müəyyən edilib.
Müvafiq icra hakimiyyəti orqanının müəyyən etdiyi orqanın (qurumun) gəlirləri nəzərə alınmadan, Azərbaycanın 2019-cu il icmal büdcəsi kəsirinin yuxarı həddinin məbləği 13 586 300,0 min manat məbləğində müəyyən edilib.
2019-cu ildə daxili dövlət borclanmasının yuxarı həddi 500 mln manat, xarici dövlət borclanmasının yuxarı həddi 1 mlrd manat olacaq. İl ərzində veriləcək dövlət zəmanətlərinin məbləğinin yuxarı həddi 4 mldr manatı keçməyəcək.
Bu qanun 2019-cu il yanvarın 1-dən qüvvəyə minir.
