"Azərbaycanda ekoloji təmiz avtomobillərin istismarı və təmiz ətraf mühit” mövzusunda mətbuat konfransı keçirilib.
FED.az xəbər verir ki, konfransda Azərbaycan Respublikası Dövlət Gömrük Komitəsi, Azərbaycan Respublikası Ekologiya və Təbii sərvətlər nazirliyi, Azərbaycan Respublikası Energetika nazirliyi, özəl qurum nümayəndələri, Azərbaycan Avtomobil Dilerləri Assosiasiyası və ekspertlər iştirak ediblər.
Mətbuat konfransında “Azərbaycanda ekoloji təmiz nəqliyyat vasitələrinin istifadəsinin stimullaşdırılması və genişləndirilməsi ilə bağlı” Yol xəritəsinin təqdimatı olub. Təqdimatda dövlətin bu sahədə gördüyü işlər, gələcək planlar və özəl sektorun bu işə dəstəyi haqqında geniş məlumat verilib.
Mətbuat konfransında çıxış edən Dövlət Gömrük Komitəsinin gömrük ödənişləri idarəsinin rəisi Tariyel Alverdiyev deyib ki, hazırda güzəşt tətbiq edilmiş ekoloji təmiz avtomobillərin əhatə dairəsini genişləndirilməsi müzakirə edilir.
Energetika Nazirliyinin iqtisadiyyat şöbəsinin müdiri Rauf Qurbanov isəbildirib ki, Azərbaycanda 33 elektromobil enerji doldurma məntəqəsi var: "Bu məntəqələrin 22-si Bakıda, 11-i isə regionlarda yerləşir".
O qeyd edib ki, hökumət sosial məsələləri nəzərə alaraq dizel mühərrikli avtomobillərin idxalına qadağa qoymayıb: “Amma ətraf mühitin çirklənməsinin qarşısını almaq üçün bu avtomobillərin idxalı məhdudlaşdırılmalıdır”.
Ekologiya və Təbii Sərvətlər Nazirliyinin rəsmisi Rasim Səttarzadə jurnalistlərin suallarına cavab olaraq hökumətin sosial məsələləri nəzərə alaraq dizel mühərrikli avtomobillərin idxalına qadağa qoymadığnı deyib: “Amma ətraf mühitin çirklənməsinin qarşısını almaq üçün bu avtomobillərin idxalı məhdudlaşdırılmalıdır”.
Tədbirdə çıxış edən ekspert, Yol Xəritəsini hazırlamış İşçi Qrupun üzvü Eldəniz Cəfərov qeyd edib ki, 2030-cu il üçün müəyyən edilmiş milli prioritetlərin realllaşması üçün ekoloji təmiz nəqliyyat vasitələrindən istifadənin artırılmasının əhəmiyyəti var.
"Ölkədə ekoloji təmiz avtomobillərin istismarı üçün münasib şəraitin yaradılması bu sahədə artıma səbəb olub. Hesab edirik ki, bu prosesə özəl sektor da öz töhfəsini verəcək. Hazırda avtokreditlər üzrə faizlər bir qədər yüksəkdir. Təklif var ki,banklar daha uyğun şərtlərlə avtomobil kreditləri versin. Bu isə yeni, ekoloji avtomobillərə əlçatanlığı artırar. Hesab edirəm ki, həm dövlət, həm də özəl sektorun irəli sürəcəyi təşəbbüslər 2022-ci il ərzində təklif ediləcək", - deyə o, qeyd edib.
Azərbaycan Avtomobil Dilerləri Assosasiyasının nümayəndəsi Eyyub Əliyev bildirib ki, 2015-ci ildə baş verən devalvasiya rəsmi avtomobil idxalçılarına mənfi təsiri olub. Devalvasiyanın nəticəsində ölkəmizdə köhnə avtomobillərin idxalı sürətlə artıb. İndi çalışmaq lazımdır ki, ölkənin avtomobil parkı ekoloji təmiz nəqliyyat vasitələri ilə yenilənsin.
Mətbaut konfransında özəl sektorun bu sahədə görəcəyi işlərin qrafiki və hesabat dövrü açıqlanıb. Qeyd edilib ki, məlumatlandırma, maarifləndirmə və sosial məsuliyyət istiqamətində işlər ilin sonunadək davam etdiriləcək.
