Paytaxtda pandemiyanın yayılması ilə əlaqədar metronun fəaliyyətini dayandırması sərnişin axınını avtobuslara yönəltdi. Bununla belə günün pik saatları istisna olmaqla paytaxtda avtobusların heç də sıx deyil, yarıdolu vəziyyətdə getdiyinin şahidi oluruq.
Nəqliyyat üzrə ekspert Ərşad Hüseynov FED.az-a verdiyi açıqlamada avtobuslarda sərnişin azlığının səbəblərinə toxunub:
“Birinci dəfə Bakıda karantin rejimi dövründə metro bağlananda avtobuslar daha çox yükləndi. Bu dəfə isə avtobuslarda sıxlıq nisbətən azdır. Çünki sərnişinlər daha diqqətli davranırlar. Artıq əksəriyyət bilir ki, virus daha geniş yayılıb. Birinci dəfə isə virusun varlığına çox adam inanmırdı. Çünki o vaxt yoluxma az idi. İndi isə gündəlik yoluxma halı çoxdur. İnsanlar arasında məlumat da kifayət qədərdir. İnsanlar artıq özlərini qorumağa daha diqqətlə yanaşır, daha az evdən çıxır və daha az avtobusdan istifadə edirlər. Buna görə sərnişinlərə təşəkkür etmək olar”.
Ekspert sərnişin sıxlığının az olmasında daşıyıcı şirkətlərin də əməyini xüsusi vurğulayıb:
“Bakı Nəqliyyat Agentliyi (BNA) fəaliyyətini operativ həyata keçirir və daşıyıcıları tam səfərbər edib. Paytaxtda sərnişindaşımanı həyata keçirən daşıyıcı şirkətlər tam səfərbər olublar. Hazırda iqtisadi maraqlar kənara qoyularaq əhali ilə birgəlik nümayiş etdirilir ki, iqtisadi baxımdan zərərli olsa da bu vəziyyətdən çıxılsın. Ekspres və digər marşrutların tezliyi bu dəfə daha yüksəkdir. Dövlət idarələri də bu dəfə prosesə daha həssas yanaşdılar. Fəaliyyətinə icazə verilən qurumlar öz işçilərini daşımaq üçün servislər təşkil edirlər. İş qrafiklərin sürüşdürülməsi də aparılır ki, bu da sərnişin sıxlığına təsir edir”.
