Sumqayıtda «Azərsu»yun abunəçilərindən biri ilə su və kanalizasiya pulu mübahisəsi Konstitusiya Məhkəməsinin Plenumuna qədər böyüyüb.
FED.az xəbər verir ki, su pulu mübahisəsi ilə ortaya çıxan hüquqi problem bütün iddia müddətlərinin bir daha dəqiqləşdirilməsi ilə başa çatıb.
Mübahisə 2022-ci ildə başlayıb. «Azərsu» istifadə olunmuş su və kanalizasiya xidmətlərinin uzun müddətdir ödənilmədiyinə görə, növbəti abunəçisini («su pulu» məhkəmələri çoxdur) məhkəməyə verib. Sumqayıt Şəhər Məhkəməsində baxılan işdə məhkəmə iddianı qismən təmin edib və abunəçidən 362 manat ödənişin «Azərsu»ya ödənilməsi barədə qərar verib. Su pulu borcu bundan daha artıq olduğuna görə, «Azərsu» bu qərarla razılaşmayıb və Sumqayıt Apellyasiya Məhkəməsçinə müraciət edib. Məhz burada iddia müddətləri, iddia müddətinin başlama və bitmə vaxtının hesablanması, eləcə də bu anlayışların tətbiqi ilə bağlı qeyri-müəyyənlik ortaya çıxıb. Apellyasiya Məhkəməsinin müraciətindən sonra məsələyə Konstitusiya Məhkəməsində baxılması qərara alınıb.
KM-in ənənəvə heyəti və maraqlı tərəfilərin təmsilçilərinin iştirak etdiyi iclasda Mülki Məcəllədəki iddia müddətləri limitləri və onun tətbiqi bir daha araşdırılıb.
Daha dəqiqi Mülki Məcəlləsinin 372.1, 373.1, 373.3, 551.1, 551.2.1 və 553.1.1-ci maddələrinin Azərbaycan Konstitusiyasının 60-cı maddəsi baxımından şərh olunmasına dair konstitusiya işinə baxılıb. Xatırladaq ki, MM-in xatırlanan maddələri iddia müddətlərinə aiddir.
Maddə 372. İddia müddəti anlayışı
372.1. Başqa şəxsdən hər hansı hərəkəti yerinə yetirməyi və ya yerinə yetirməkdən çəkinməyi tələb etmək hüququna müddət şamil edilir.
373.1. Ümumi iddia müddəti on il təşkil edir.
373.3. Vaxtaşırı icra edilməli öhdəliklərdən irəli gələn tələblər üzrə iddia müddəti üç ildir.
Maddə 551. Öhdəliklərin xitamı üçün müddətlər
551.1. Əgər bu Məcəllə ilə ayrı qayda müəyyənləşdirilməyibsə, bütün tələblər on il (adi müddət) keçdikdən sonra qüvvəsini itirir.
551.2.1. kirayə haqqı, icarə haqqı, kapital üçün faizlər və digər vaxtaşırı ödənişlər haqqında tələblər;
Maddə 553. Öhdəliklərin xitamı üçün müddətin kəsilməsi
553.1.1. mükəlləfiyyətli şəxs tələbi ixtiyarlı şəxsə hissə-hissə ödənişlərlə, faizlər ödəməklə, təminat verməklə və ya digər üsulla icra edirsə;
Və məlum olub ki, Məcəllənin 27-ci fəslinin 5-ci paraqrafında (§ 5. Müddətin keçməsinə görə öhdəliyin xitamı) göstərilən müddətlər bu sahəni tam tənzimləmir. Və bu sahədə təkmilləşməyə ehtiyac var.
Qərar verilib ki, Mülki Məcəllənin 27-ci fəslinin 5-ci paraqrafı qanunverici orqan tərəfindən təkmilləşdirilənədək, öhdəliklərdən, o cümlədən vaxtaşırı ödəmələrdən irəli gələn tələblərə münasibətdə həmin Məcəllənin 18-ci fəsli ilə nəzərdə tutulmuş iddia müddətləri tətbiq edilsin.
Xatırladaq ki, 18-ci fəsilə aidolan 373-cü maddədə iddia müddətləri belə nəzərdə tutulub:
Maddə 373. İddia müddətləri
373.1. Ümumi iddia müddəti on il təşkil edir.
373.2. Müqavilə tələbləri üzrə iddia müddəti üç il, daşınmaz əşyalarla bağlı müqavilə tələbləri üzrə iddia müddəti isə altı ildir.
373.3. Vaxtaşırı icra edilməli öhdəliklərdən irəli gələn tələblər üzrə iddia müddəti üç ildir.
373.4. Tələblərin ayrı-ayrı növləri üçün bu Məcəllə ilə ümumi müddətə nisbətən qısaldılmış və ya uzadılmış xüsusi iddia müddətləri təyin edilə bilər.
373.5. Bu Məcəllənin bu fəslində müəyyənləşdirilmiş qaydalar, əgər qanunla ayrı hal müəyyənləşdirilməyibsə, xüsusi iddia müddətlərinə də şamil edilir.
Bildirilir ki, bu qərar dərc edildiyi gündən qüvvəyə minir. Qərar qətidir, heç bir orqan və ya şəxs tərəfindən ləğv edilə, dəyişdirilə və ya rəsmi təfsir edilə bilməz.
