Azərbaycan manatı revalvasiya təzyiqi ilə üzləşib.
FED.az xəbər verir ki, bu barədə faiz dəhlizinin parametrlərinin elan edilməsinə dair mətbuat konfransında Mərkəzi Bankın sədri Elman Rüstəmov bildirib.
Eləcə də bax: "Manatın məzənnəsinə müdaxilə etmirik"
Qeyd edək ki, devalvasiyaya əks proses olan revalvasiya – hər hansı bir valyutanın digər valyutalar qarşısında dəyərinin artmasıdır.
“Nə bu il, nə də növbəti il makroiqtisadi sabitlik, o cümlıdən, manataın məzənnəsinin dayanıqlığı üzərində heç bir təhlükə yoxdur”, - Elman Rüstəmov deyib.
Elman Rüstəmov əlavə edib ki, Manatın məzənnəsi “çox əhəmiyyətli” möhkəmlənmə təzyiqləri altındadır:
“Əksinə valyuta bazarında olan situasiya göstərir ki, (valyuta hərraclarında təklif tələbi üstələyir - red) Manatın məzənnəsi “çox əhəmiyyətli” möhkəmlənmə təzyiqlərilə qarşı - qarşıyadır. Biz bu təzqiyin ilin sonuna qədər bir qədər neytrallaşacağını gözləyirik. Bu gün söhbət, cari situasiya ilə Manatın məzənnəsinin möhkəmlənməsi təzyiqindən gedir. Manatın məzənnəsinin azaldılması, dəyərdən salınması istiqamətində heç bir təzyiq görmürük. Nə Azərbaycan hökumətinin, nə də Mərkəzi Bankın Manatın ucuzlaşdırılması barədə planları yoxdur, bunu açıq və net deyirəm. Bu ilin proqnozları və növbəti ilin proqnozları Azərbaycan Manatının məzənnəsinin dayanıqlığı üzərində qurulub. Əhalini həyacanlandırmaq düzgün deyil”.
AZƏRBAYCANA DAXİL OLAN VALYUTANIN, ÇIXAN VALYUTANI ƏHƏMİYYƏTLİ ÜSTƏLƏYƏCƏYİ GÖZLƏNİLİR
Elman Rüstəmov qeyd edib ki, bu il neft qiymətləri yüksəkdir: “Azərbaycanın ixracı, o cümlədən qeyri-neft ixracı artır, idxalı isə daha zəif sürətlə artır. Biz 2021-ci ilin sonunda tədiyyə balansında əhəmiyyətli profisit gözləyirik. Bütün beynəlxalq təşkilatlar neft qiymətləri üzrə proqnozlarını artırıblar. Azərbaycanın yeni makro-iqtisadi proqnozları və 2022-ci ilin dövlət büdcəsi neftin qiyməti 50 dollar götürülərək hesablanmışdır. Bütün hesablamalar Manatın mövcud məzənnəsi ilə (Dollar/Manat - 1.70 AZN - red) aparılıb”.
"VALYUTA HƏRRACLARININ 84%-İNDƏ TƏKLİF TƏLƏBİ ÜSTƏLƏYİB, 1,2 MİLYARD DOLLLAR SATILMAYIB"
Mərkəzi Bankın sədri bildirib ki, cari ilin ötən dövründə Mərkəzi Bankda keçirilmiş valyuta hərraclarının 84%-inndə təklif tələbi üstələyib:
"Cari ildə keçirilmiş 81 valyuta hərracında cəmi 4,9 milyard dollar satılıb ki, bu da orta hesabla hər hərracda 60 milyon dollar satışın olduğu deməkdir. İlin qalan dövründə keçiriləcək hərraclarda satış üçün qalan vəsait 2,4 milyard dolllar təşkil edir, bu da qalan hər hərracda orta hesabla 130 milyon dollar satış imkanının olduğu deməkdir. Bugünə Dövlət Neft Fondunun qənaəti, yəni qrafikdən geri qalması 1,2 milyard ABŞ dollarını üstələyir". (Marja)
