2024-cü ildə Azərbaycandan xalis vəsait çıxışı artsa da, ölkə cari hesab profisitini qoruyub.
FED.az xəbər verir ki, bu barədə Dünya Bankından bildirilib.
Qeyd edilib ki, 2024-cü ildə Vyetnam, Qazaxıstan, Misir, Argentina və Azərbaycan üzrə xalis borc vəsaitlərinin çıxışı baş verib. Bu, həmin ölkələrdən xaricə gedən vəsaitlərin daxil olan vəsaitləri üstələməsi ilə izah edilir.
Bununla belə, Dünya Bankı vurğulayır ki, Azərbaycan cari əməliyyatlar balansı üzrə profisit əldə edən azsaylı ölkələrdən biridir. LMIC (aşağı və orta gəlirli ölkələr) qrupunda 2024-cü ildə cəmi 23 ölkənin cari əməliyyatlar balansı profisitl olub və onların sırasında Azərbaycan da var. Profisit ölkənin enerji ixracından əldə etdiyi yüksək gəlirlərlə bağlıdır.
Hesabata əsasən, 2024-cü ildə LMIC ölkələrinin təxminən 75%-i cari hesab kəsiri ilə üzləşib. Xarici ticarət gəlirlərində azalma, geosiyasi gərginlik və qlobal ticarət siyasətindəki qeyri-müəyyənlik bu ölkələrin, o cümlədən Azərbaycanın ixrac gəlirlərinə təsir edə biləcək əsas risklər kimi göstərilir.
Vurğulanıb ki, Çin istisna olmaqla LMIC ölkələri 2008-ci ildən bəri fasiləsiz cari hesab kəsiri ilə fəaliyyət göstərir. Bununla belə, enerji ixracı hesabına Azərbaycan bu trenddən kənarda qalıb. (Apa)
