Beynəlxalq Valyuta Fondu (BVF) 2021-ci il üçün Azərbaycan hökuməti ilə Fondun nizamnaməsinin IV maddəsi üzrə məsləhətləşmələri ("2021 Article IV Consultation") yekunlaşdırıb.
Eləcə də bax: BVF Azərbaycan üçün neftin itkisiz qiymətini - AÇIQLAYIB
FED.az biznes və maliyyə xəbərləri portalı Apa-ya istinadən xəbər verir ki, BVF-nin sənədində bildirilir ki, Azərbaycan COVID-19 pandemiyası və neft qiymətlərinin enişindən ciddi zərərlə üzləşib, lakin hökumətin böyük yardım paketi şokun iqtisadi təsirini azaltmağa kömək edib. Qeyri-neft iqtisadiyyatının pandemiyadan bərpa olduğu üçün iqtisadi fəaliyyətin 2021-ci ilin nəticələrinə görə artacağı proqnozlaşdırılır.
BVF-nin proqnozlarına görə, bu il Azərbaycanın qeyri-neft ÜDM-i 4,5% artacaq, 2022-ci ildə qeyri-neft ÜDM-in 3,5% artacağı proqnozlaşdırılır. Lakin daha təhlükəli COVID-19-un ştamlarının yayılması və/yaxud vaksinasiyanın ləngiməsi iqtisadiyyatın yenidən açılmasını gecikdirə bilər. Qlobal tələbatın gözləniləndən daha asta bərpası neft sektoru üçün də risk yarada bilər.
"Digər tərəfdən, gözləniləndən daha sürətli qlobal bərpa, neft və qaz qiymətlərini yüksəldə, gəlirləri artıra, fiskal və xarici tarazlığı gücləndirə bilər. Neft ehtiyatlarının tədricən tükənməsi fonunda iqtisadiyyatın şaxələndirilməsi və qeyri-neft sektorunun məhsuldarlığının yüksəldilməsi və Azərbaycanın iqtisadi perspektivlərinin gücləndirilməsi üçün sürətləndirilmiş struktur islahatlarına ehtiyac var" ,- sənəddə deyilir.
Beləliklə, BVF-nin İcraiyyə Şurası qeyd edir ki, Azərbaycan üçün yaxın gələcəkdə əsas çağırış struktur problemlərinin həlli üçün zəmin hazırlayarkən, bərpa prosesini təhlükəyə atmamaq ehtiyacını tarazlaşdırmaqla, COVID-19-la əlaqəli stimullaşdırıcı paketlərin mərhələli şəkildə ləğv edilməsini düzgün şəkildə qurmaqdır. Uzunmüddətli perspektivdə isə Azərbaycanın neft ehtiyatlarının tükənməsi problem yarada bilər və bu səbəbdən iqtisadiyyat neft gəlirlərindən asılılığını aradan qaldırmalıdır.
Qeyd edək ki, BVF-nin nizamnaməsinin IV maddəsi üzrə sonuncu məsləhətləşmələr 2019-cu ilində aparılıb. 2020-ci ildə sözügedən konsultasiya pandemiya səbəbindən baş tutmayıb.
Xatırladaq ki, IV maddəyə Azərbaycan iqtisadiyyatının bütün sahələrində icmalın aparılması və sonradan ölkə hökumətinə təklif və tövsiyələrin verilməsi daxildir.
