Kommunal xidmətlərə Strateji Yol Xəritəsinin ümumi icra vəziyyəti 68 faizdir; proje monitorinq edildi
“Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsi”nin 2017-ci ildəki icra vəziyyəti monitorinq olunub. FED.az xəbər verir ki, monitorinqi həyata keçirən İqtisadi İslahatların Təhlili və Kommunikasiya Mərkəzinin eksperti Ramil Hüseynin dediyinə görə, yeddi strateji hədəfdən ibarət olan bu Strateji Yol Xəritəsinin ümumi icra vəziyyəti 68 faizdir. Sənəd çərçivəsində 2017-ci il üzrə nəzərdə tutulan tədbirlərin 55 faizinin icrası tamamlanıb, 25 faizi qismən icra edilib, 20 faizi isə icra edilməyib.
Strateji yol xəritəsinin birinci hədəfi olan kommunal xidmətlər sektorunun tənzimlənməsində dayanıqlılığın və effektivliyin təmin edilməsi çərçivəsində nəzərdə tutulan tədbirlərin 91 faizi icra edilib, 9 faizi icra edilməyib. Bu strateji hədəf üzrə Energetika Nazirliyinin tabeliyində Enerji Məsələlərini Tənzimləmə Agentliyi yaradılıb. Nazirlər Kabinetinin qərarı ilə “Elektroenergetika və qaz təchizatı sahəsində fəaliyyət göstərən paylarının (səhmlərinin) nəzarət zərfi dövlətə məxsus olan hüquqi şəxslər arasında qarşılıqlı ödəniş məsələlərinin tənzimlənməsi və daxil olan vəsaitlərdən istifadə Qaydası” təsdiq edilib.
İkinci strateji hədəf olan tam şaxələndirilən və ekoloji baxımdan təmiz elektrik enerjisi istehsalının təmin edilməsi üzrə işlərin 56 faizi tam, 36 faizi qismən icra edilib, 18 faiz isə icra edilməyib. Bu hədəf çərçivəsində nəzərdə tutulan tədbirlərin icrası nəticəsində elektrik enerjisinə ölkədaxili ehtiyacın proqnozlaşdırılmasına dair geniş hesabat hazırlanıb.
Sənədin üçüncü strateji hədəfi olan dünya üzrə orta səmərəlilik və keyfiyyət standartlarının tətbiqi və məqsədlərə nail olmaq üçün mexanizmlərin işə salınması sahəsində nəzərdə tutulan tədbirlərin 42 faizi tam, 25 faizi qismən icra edilib, 33 faizi isə icra olunmayıb. Bu hədəf çərçivəsində elektrik stansiyalarının potensialından səmərəli istifadənin təmin edilməsi məqsədilə tədbirlər planı hazırlanıb və müvafiq təkliflər Nazirlər Kabinetinə təqdim edilib.
Qeyd edilən yol xəritəsinin dördüncü hədəfi olan “Səmərəli və effektiv qazpaylama infrastrukturunun yaradılması”nın 2017-ci ilə aid tədbirlərinin 27 faizi tam, 33 faizi qismən icra edilib, 40 faizi isə icra edilməyib. Hədəf üzrə nəzərdə tutulan tədbirlərə uyğun olaraq qaz şəbəkəsinin mövcud vəziyyəti və qaz itkiləri təhlil olunub, qaz itkilərinin səviyyəsinin tələb olunan minimal göstəriciyə çatdırılması məqsədilə inkişaf planı hazırlanıb.
Beşinci hədəf olan “Yüksəksəviyyəli su idarəetmə strukturunun yaradılması” nın 2017-ci ildə icra vəziyyəti belədir: 78 faiz icra edilib, 20 faiz qismən icra edilib.
Altınci strateji hədəf olan “Su təchizatında itkilərin azaldılması və səmərəliliyin təmin edilməsi” çərçivəsində nəzərdə tutulan tədbirlərin 50 faizi icra edilib, 50 faizi qismən icra edilib.
Strateji yol xəritəsinin sonuncu “Dayanıqlı və etibarlı istilik təchizatı infrastrukturunun yaradılması” hədəfinin 2017-ci ildə 69 faizi tam icra edilib, 17 faizi qismən icra edilib, 14 faizi isə icra edilməyib. Bu hədəf çərçivəsində Bakı şəhəri və respublikanın regionlarında istilik təchizatı sistemlərinin fəaliyyəti ilə bağlı monitorinqlər davam etdirilib, qiymətləndirmələr aparılıb, yenidən qurulması, modernləşdirilməsi və tikintisi nəzərdə tutulan bəzi obyektlər üzrə istilik mənbələrinin layihə-smeta sənədləri hazırlanaraq razılaşdırmaya və ekspertizaya təqdim edilib və zəruri mühəndis hazırlığı işləri aparılıb.
Özəl və kommersiya yönümlü istilik təchizatı sistemlərinin yaradılması ilə bağlı təhlillər aparılıb, istilik itkilərinin minimuma endirilməsi və xərclərin azaldılması istiqamətində işlər görülüb.
Əsas icraçı qurumların performansına gəldikdə isə Vətəndaşlara Xidmət və Sosial İnnovasiyalar üzrə Dövlət Agentliyi Strateji Yol Xəritəsində 2017-ci ildə nəzərdə tutulan tədbirlərin 100 faizini, “Azəristiliktəchizat” ASC isə 93 faizini yerinə yetirib. İqtisadiyyat Nazirliyi qeyd edilən dövr ərzində nəzərdə tutulan tədbirlərin müvafiq olaraq 89 faizini, Azərsu" ASC 79 faizini, Maliyyə Nazirliyi 75 faizini, Tarif (qiymət) Şurası 67 faizini, Energetika Nazirliyi 64 faizini yerinə yetiriblər. Digər qurumlardan isə “ ”Azərenerji" ASC 50 faiz, Azərbaycan Respublikası Dövlət Neft Şirkəti 46 faiz, “Azərişıq” ASC 38 faiz icra göstəricilərinə malikdirlər.
musavat.com
