ABŞ və İran arasında ziddiyyətli açıqlamaların davam etməsi, həmçinin bölgədə gərginliyin tam aradan qalxmaması bazarlarda narahatlığı saxlayır.
FED.AZ biznes və maliyyə xəbərləri portalı “Anadlou Ajansı”na istinadən xəbər verir ki, müsbət və mənfi xəbərlər səhm bazarlarında dalğalanmalara səbəb olur. ABŞ tərəfi gərginliyin azala biləcəyinə dair optimist mesajlar versə də, İranın fərqli mövqe sərgiləməsi aktiv qiymətlərində dəyişkənliyi artırır.
ABŞ Prezidenti Donald Trump bildirib ki, İranın enerji infrastrukturuna hücumlara 5 günlük fasilə verilib. Bununla yanaşı, bölgəyə minlərlə əsgərin göndərilməsi mümkün quru əməliyyatı ehtimalını gündəmdə saxlayır.
Ağ Evin sözçüsü Karoline Leavitt qeyd edib ki, ABŞ və İran arasında danışıqlar davam edir. Onun sözlərinə görə, Tramp sülh tərəfdarıdır, lakin İran vəziyyəti qəbul etməzsə, daha sərt addımlar ata bilər.
Analitiklər bildirirlər ki, bölgə ilə bağlı xəbərlər bazarların istiqamətini müəyyən edəcək və qiymətlərdə kəskin dəyişikliklər ola bilər.
Bölgədə aşağı intensivlikli qarşıdurmalar davam edir. Hörmüz boğazından tanker keçidlərinin artması və enerji obyektlərinə hücumların azalması neft qiymətlərindəki kəskin artımı məhdudlaşdırıb.
“FED”in siyasəti diqqətdədir
Neftin bahalaşmasının inflyasiyanı artıracağı gözlənilir. Bu səbəbdən “Federal Reserve”in sərt mövqeyini qoruyacağı ehtimal olunur. Bazarlar ilin sonuna qədər faizlərin dəyişməyəcəyini düşünür, faiz endirimi ehtimalları isə zəifləyib.
“Fed”in açıqladığı hesabatda bankın 2025-ci ildə 18,7 milyard dollar zərər etdiyi bildirilib. Son 3 ildə ümumi zərər 210 milyard dolları keçib.
ABŞ-da fevral ayında idxal qiymətləri 1,3%, ixrac qiymətləri isə 1,5% artıb. Cari əməliyyatlar kəsiri isə 190,7 milyard dollara enərək son illərin ən aşağı səviyyəsinə düşüb.
Qızıl və bazar göstəriciləri
ABŞ-ın 10 illik istiqraz faizi 4,36% səviyyəsindədir. Dollar indeksi isə 100 səviyyəsinə yaxın qalır.
Gərginliyin azalması fonunda qızılın qiyməti əvvəlcə artaraq 4 506 dollara yüksəlib, daha sonra isə 4 490 dollara geriləyib.
ABŞ fond bazarlarında artım qeydə alınıb:
“S&P 500” – 0,54%
“Nasdaq” – 0,77%
“Dow Jones” – 0,66%
Avropa bazarları
Avropada mümkün atəşkəslə bağlı optimizm fonunda bazarlar yüksəlib. Christine Lagarde bildirib ki, enerji qiymətlərindəki artım inflyasiyaya təsir edə bilər və lazım gələrsə monetar siyasət dəyişdirilə bilər.
Bazarlar “European Central Bank”ın ilin sonuna qədər faizləri artıracağını ehtimal edir. Avropa İttifaqı Şurasının rəhbəri Antonio Costa isə yüksək enerji qiymətlərinin iqtisadiyyata təzyiq etdiyini vurğulayıb.
Avropa indeksləri artıb:
“FTSE 100” – 1,42%
“CAC 40” – 1,33%
“DAX 40” – 1,41%
Asiya bazarları
Asiyada qeyri-müəyyənlik davam edir və bu, riskləri artırır. Yaponiyada istehsalçı qiymətlərinin artması “Bank of Japan”ın sərt siyasətə keçə biləcəyi ehtimalını gücləndirib.
Bunun nəticəsində istiqraz faizləri yüksəlib. Fond bazarlarında isə eniş müşahidə olunub:
“Nikkei 225” – 0,5% azalma
“Kospi” – 2,2% azalma
“Hang Seng” – 1,4% azalma
