“Fikrimcə, şəhərimizdə ictimai məqsədlər üçün inşa olunan obyektlər kifayət qədər maraqlı və keyfiyyətlidir. Təəssüf ki, belə qiyməti geniş vüsət alan yaşayış tikintisinə şamil etmək çətindir. Son illər ərzində inşa olunmuş çoxsaylı yaşayış evlərinin bəziləri tam simasız və tam zövqsüzdür”.
FED.az-ın məlumatına görə, bunu Azərbaycan Memarlar İttifaqının İdarə Heyətinin sədri,Respublikanın Əməkdar memarı Elbay Qasımzadə bildirib.
Onun sözlərinə görə,bunların tikintisinə sərf olunmuş vəsaitdən başqa, burada yaşayan sakinlərə mənəvi ziyan dəyir.
“Memarlıq insanın mənəviyyatına təsir edən sənət növüdür. Onların həyat tərzinə, zövqünə, hətta tərbiyəsinə belə təsiri var. Bu simasız binaların, orada yaşayıb böyüyən gənclərimizin tərbiyəsinə necə təsiri olacağını düşünəndə məyus oluram. Bunun bir neçə ciddi səbəbi var. İlkin səbəbi, əlbəttə, layihələri hazırlayan memarların kəmsavadlılığı və yaxud biganəliyidir. Hər ikisi xalqa, sənətə xəyanət kimi qiymətləndirilə bilər.
İkinci səbəb layihələrin, mütəxəssislərin müzakirəsinə çıxarılmadan, məmur kabinetlərində təsdiqlənməsi və qəbul edilməsidir. Bu barədə dəfələrlə danışılsa da, “yükü” yerdən qaldıran yoxdur. Hərçənd ki, bu layihələrin ictimaiyyət tərəfindən bəyənilməsi ideyası böyük bir kəşf mövzusu deyil. Belə qurum olub. Bakının baş memarı yanında Şəhərsalma Şurası 1990-cı ildən 2001-ci ilə qədər fəaliyyət göstərib və bir çox baş verə biləcək səhvlərin qarşısını alıb. Sonralar “əl-ayağa dolaşan” olmasın deyə, ləğv edilib.
Bakı kimi möhtəşəm, unikal memarlığa məxsus şəhərdə bir adamın (hətta mütəxəssis olsa belə) fikri ilə şəhərin memarlıq simasına təsir edəcək layihənin qiymətləndirilməsi böyük faciədir.
Elbay Qasımzadə hesab edir ki, memarların lisenziyalaşdırılmasında və layihələrin müzakirələrində mütləq qeyri-dövlət qurumunun iştirakı zəruridir. Belə təcrübə bir çox səhv qərarların qarşısını ala biləcəkdir.
“Belə qurum var. Bu, Memarlar İttifaqıdır. Həm beynəlxalq səviyyədə və həm də dövlət rəhbərliyi qarşısında kifayət qədər nüfuzumuz var. Biliyimiz isə, yəqin ki, heç kəsdə şübhə doğurmur. Burada bir fikrimi də bölüşmək istərdim. Ölkəmiz müstəqillik dövründə böyük inkişaf yolu keçib.
Həm iqtisadiyyatda, həm də demokratik quruluşda. Bu gün dövlətçiliyimiz o dərəcədə dayaqlıdır ki, hökumətin bəzi vəzifələrini ictimai qurumlara həvalə etmək olar. Misal üçün, yuxarıda qeyd etdiyim layihələrin qiymətləndirilməsi və peşəkarlıq hüquqlarının verilməsi peşəkar ictimai qurumlar tərəfindən aparılaraq, hökumətə dəstək olar. Bunun üçün qanunvericilikdə bəzi dəyişikliklər edilməsi məqsədəuyğun olardı.
Etiraf edək ki, aidiyyəti olan məmurlar bunun təşəbbüskarı olmayacaq. Bunu etməkdən ötrü “Yaradıcı birliklər haqqında” Azərbaycan Respublikasının Qanunu olması ümumxalq işimizə fayda verər...Belə bir Qanun layihəsi bir neçə il öncə hazırlanmışdır. Onun hazırlanmasında mən də iştirak etmişəm. Hətta bilirəm ki, Milli Məclisdə birinci oxunuşdan da keçmişdi. Lakin sonra kiminsə xoşuna gəlməməsi ucbatından gündəlikdən çıxarıldı”.
Marja.az
