ABŞ-ın İran tətbiq etdiyi sanksiyaları pozmaq üçün saxtakarlıq etdiyi iddiası ilə Kanadada həbs olunan Çinin texnologiya şirkəti "Huawei"in Maliyyə direktoru (CFO) Mıng Vancounun 10 milyon Kanada dolları (7,5 milyon ABŞ dolları) qarşılığında şərtli sərbəst buraxılmasına qərar verilib
Beynəlxalq ictimaiyyətin və bazarların yaxından izlədiyi məhkəmə iclasında, kanadalı hakim Uilyam Ehrcken şərtli olaraq buraxılmasına hökm edib. Hakimin təyin etdiyi girov şərtlərinə görə, Vankouver şəhərindəki evində qalacaq Mıng məhkəməyə 7 milyonu nağd və 3 milyonu daşınmaz əmlak şəkilində olmaqla 10 milyon Kanada dollarını təminat olaraq təqdim edəcək.
Mıngın ayaq topuğuna GPS qəbuledicisi taxılacaq və 7/24 izlənəcəkdir. Mıng müəyyən edilən bölgədən kənara çıxmayacaq və mövcud bütün pasportlarını Kanada rəsmilərinə təslim edəcək.
Mıng Vancou "Huawei"in sahibi Ren Zhengfei-in də qızıdır. O, ABŞ-ın İran sanksiyalarını pozduğu iddiası ilə Vaşinqtonun tələbi ilə 1 Dekabrdan bəri Vankouverdəki bir həbsxanada saxlanılırdı.
Mıngın aqibəti, ABŞ rəhbərliyinin Kanadadan ekstradisiya tələb edib etməməsindən asılı olacaq. Kanadalı hakim Ehrcke, Amerikanın sözügedən tələbini təqdim etməsi üçün 60 günü olduğunu bildirib.
Mıngın ABŞ-a ekstradisiya edilməsi halında Nyu-York Şərq Bölgəsi Məhkəməsində "birdən çox beynəlxalq qurumu aldatmaq üçün hiylə qurmaq" cinayətindən mühakimə olunacağı və günahkar olması halında 30 il həbs cəzası ala biləcəyi bildirilir.
Digər tərəfdən, ekspertlər, Mıngın şərti sərbəst buraxılmasının həbs xəbəri ilə gərginləşən ABŞ-Kanada-Çin əlaqələrində gərginliyin azalmasına kömək edəcəyini bildirirlər.
Çinin iri texnologiya şirkəti "Huawei"nin Maliyyə direktoru Mıng Vancou, ABŞ-ın İrana tətbiq etdiyi sanksiyaları pozduğu iddiası ilə ABŞ-ın tələbi ilə Kanada orqanları tərəfindən 1 Dekabrda Vankouver şəhərində saxlanılıb. Hadisənin, ABŞ Prezidenti Donald Tramp və Çin Dövlət Başçısı Şi Cinpingin Argentinada keçirilən G-20 Sammitində ticarətdə yaşanan gərginliyi azaltmaq üçün keçirdiyi görüş zamanı baş verməsi diqqəti çəkmişdir.
Hadisədən sonra Çin Xarici İşlər Nazirliyi, Kanadanı insan hüquqlarını pozmaqda günahlandırmış və "Huawei" rəsmisinin dərhal azadlığa buraxılmasını tələb etmişdi.
Çinin Şenzhen şəhərində 1987-ci ildə yaradılmış və bu gün dünyanın ən böyük telekommunikasiya şirkətləri arasında yer alan "Huawei"nin 170 ölkədə 180 mindən çox əməkdaşı var. İnformasiya və kommunikasiya texnologiyası (ICT) həlləri, şəbəkələr, bulud, ağıllı telefon və internet sahələrində xidmət göstərən "Huawei"nin il sonunda bazar dəyərinin 100 milyard dolları keçəcəyi gözlənilir.
