“Paşa Kapital İnvestisiya Şirkəti” QSC 2024-cü il üzrə maliyyə hesabatını açıqlayıb.
Faiz Gəlir və Xərcləri Kəskin Artıb
FED.az xəbər verir ki, 2024-cü il şirkətin faiz əməliyyatları üçün kəskin böyümə dövrü olub. Cəmi faiz gəlirləri 4 milyon 543,6 min manata çatıb ki, bu da ötən ilə nisbətən 2 milyon 501,2 min manat və ya 2,2 dəfəlik artım deməkdir. Bu artımın əsas drayveri investisiya qiymətli kağızlarından əldə edilən gəlirlər olub.
Bununla paralel olaraq, faiz xərcləri də kəskin şəkildə böyüyüb. Cəmi faiz xərcləri 2 milyon 912,9 min manat təşkil edib ki, bu da illik müqayisədə 1 milyon 797,6 min manat və ya 2,6 dəfəlik artım deməkdir. Xərclərin böyüməsi əsasən REPO razılaşmaları üzrə borc öhdəlikləri ilə bağlıdır. Nəticədə, şirkətin xalis faiz gəliri 703,6 min manat (75,9%) yüksələrək 1 milyon 630,7 min manata çatıb.
Şirkətin qeyri-faiz əməliyyatları da böyüyüb. Qeyri-faiz gəlirləri 6 milyon 613,7 min manat təşkil edib ki, bu da 981,2 min manat (17,4%) artımdır.
Xalis haqq və komissiya gəliri şirkətin əsas gəlir drayveri olub. Bu maddə üzrə gəlirlər 5 milyon 466,9 min manata çatıb ki, bu da illik müqayisədə 2 milyon 431,9 min manatlıq (80,1%) kəskin artım deməkdir.
Bunun əksinə olaraq, maliyyə alətləri ilə dilinq əməliyyatlarından əldə olunan gəlir 1 milyon 146,9 min manata bərabər olub.
Qeyri-faiz xərclərindəki artım daha yüksək olub. Həmin xərclər 5 milyon 393,1 min manata çatıb ki, bu da 1 milyon 853,2 min manat (52,3%) artım deməkdir.
İşçilərlə bağlı xərclər ən böyük artımı göstərərək 3 091,5 min manata yüksəlib. Bu, illik 1 milyon 031,9 min manat (50,1%) artım deməkdir.
Digər əməliyyat və inzibati xərclər 1 milyon 654,8 min manata çatıb ki, bu da 443,7 min manat (36,6%) daha çox xərc deməkdir.
Köhnəlmə və amortizasiya xərcləri kəskin şəkildə artaraq 643,3 min manat təşkil edib. Bu, ötən ilə nisbətən 353,9 min manat və ya 2,2 dəfəlik artım deməkdir.
624,9 min manat vergi ödənişindən sonra, “PAŞA Kapital” 2024-cü ili 2 milyon 251 min manat xalis mənfəətlə başa vurub.
Hesabat ilinin sonunda “Paşa Kapital İnvestisiya Şirkəti”nin cəmi aktivləri 64 milyon 073,6 min manat təşkil edib
Bundan pul vəsaitləri və qısamüddətli aktivlər 27 300,0 min manata bərabər olub.
İnvestisiya qiymətli kağızları portfeli 7 milyon 937,9 min manat (30,1%) artımla 34 milyon 288,7 min manata yüksəlib. Bu, şirkətin likvid vəsaitləri daha çox gəlir gətirən investisiya alətlərinə yönəltdiyini göstərir.
Öhdəliklər Əhəmiyyətli Dərəcədə Azalıb
Şirkətin maliyyə sağlamlığı baxımından ən pozitiv göstəricilərdən biri cəmi öhdəliklərin azalmasıdır. Cəmi öhdəliklər 47 558,1 min manata enərək, il ərzində 4 455,8 min manat (8,6%) azalıb.
Bu azalmanın əsas səbəbi alınmış avansların kəskin şəkildə, yəni 12 milyon 807,8 min manat (39,0%) azalması olub. Bu öhdəliklər 20 milyon 33 min manata bərabər olub.
Bununla yanaşı, REPO öhdəlikləri 7 milyon 489,5 min manat (40,6%) artımla 25 milyon 938 min manata yüksəlib. Lakin yekun nəticədə şirkət borc yükünü azaltmağa nail olub.
Kapital Kəskin Artıb
İl ərzində şirkətin cəmi kapitalı 16 515,5 min manata yüksələrək, 2 617,9 min manat (18,8%) kimi çox ciddi bir artım nümayiş etdirib. Bu artım iki əsas mənbədən qaynaqlanıb:
Bunlardan biri bölüşdürülməmiş mənfəətdir. Belə ki, şirkətin il ərzində əldə etdiyi mənfəət hesabına bu maddə 15 milyon 437,4 min manata çatıb ki, bu da 2 milyon 251,0 min manatlıq artım deməkdir. Bu rəqəm, şirkətin mənfəət və zərər hesabatında göstərilən yekun xalis mənfəəti ilə tam üst-üstə düşür.
Reallaşdırılmamış gəlirlər: İnvestisiya qiymətli kağızlarının yenidən qiymətləndirilməsi nəticəsində yaranan gəlirlər də kapitala əlavə 367,0 min manat artaraq 778,1 min manata bərabər olub.
