ABŞ prezidenti Doqnald Tramp İranda müharibənin tezliklə başa çata biləcəyi barədə açıqlama verdikdən sonra dünya bazarlarında neftin kəskin qiymət artımı səngiyib və qiymətlər enməyə başlayıb.
FED.az biznes və maliyyə xəbərləri portalı xəbər verir ki, martın 9-da bazar ertəsi tezdən neft 120 dollara kimi sıçrasa da, günün sonuna qiymətlər kəskin şəkildə aşağı düşüb. «Brent» markalı neftin qiyməti bir barel üçün 90 dollardan aşağı düşüb, yəni bazarlar Donald Trampın ABŞ-ın İranla münaqişəsinin tezliklə sona çatacağı ilə bağlı şərhlərinə reaksiya verib.
CBS News-a verdiyi telefon müsahibəsində Tramp hərbi əməliyyatın “demək olar tamamilə başa çatdığını” və əvvəlcədən planlaşdırılan 4-5 həftəlik müddətdən daha sürətlə davam etdiyini bildirib. O əlavə edib ki, İran faktiki olaraq donanmasını, rabitəsini və hava qüvvələrini itirib.
Bu açıqlamalar, neft qiymətlərinin kəskin şəkildə yüksəlməsinə səbəb olan günlərlə davam edən geosiyasi gərginlikdən sonra bazarları sakitləşdirmiş kimi görünürdü. ABŞ səhmləri də əvvəlki itkilərdən sonra 1%-dən çox yüksələrək yenidən canlandı. İnvestorlar münaqişənin daha da şiddətlənməyəcəyinə əmin olduqları üçün S&P 500 və Nasdaq Composite əvvəlki itkilərdən sonra 1%-dən çox yüksəldi.
Bununla yanaşı, elə bu gün Tramp Nümaynədələr Palatasında çıxış edərkən ABŞ-ın İranda qarşıya qoyduğu hədəfə nail olmayınca dayanmayacağını bildirib və bu sözlərdən sonra Brent nefti yenidən bahalaşaraq 95 dollara yüksəlib.
