ABŞ prezidenti Co Baydenin ziddiyyətli siyasəti neftin qiymətinin artmasına təkan verib və enerji problemlərini daha da pisləşdirib.
Eləcə də bax: Bayden Rusiyadan enerji idxalını qadağan edən qanunu - İMZALAYIB
FED.az xəbər verir ki, Texas ştatının Dallas şəhərindəki Cənub Metodist Universitetinin professoru Ceyms Koulman çərşənbə günü "The Wall Street Journal"ın saytında dərc olunan məqaləsində belə qiymətləndirib.
Koulman qeyd edib ki, Amerika lideri “hasilatın artırılması üçün addımlar atmaq əvəzinə” neft şirkətlərini tənqid edir. Eyni zamanda, Bayden seçki proqramında qarşıya qoyulan “öz yaşıl hədəflərinə sadiq qalır”. Müəllif hesab edir ki, bu, enerji sektorunda mövcud problemləri daha da gücləndirəcək.
"Seçki kampaniyasında Bayden Amerikanın neft sənayesinə qarşı son dərəcə sərt tədbirlər görəcəyini vəd edib. O, andiçmə mərasimindən bəri federal torpaqların icarəsi və inkişafı üçün dəfələrlə yeni müqavilələri dayandırıb", - müəllif bildirib.
Koulman xatırladıb ki, ABŞ prezidenti bundan əvvəl Kanadadan ABŞ-a neft kəmərinin tikintisini dayandırmaq haqqında fərman imzalayıb, həmçinin Konqresi neft və qaz şirkətlərini istifadə olunmamış icarəyə götürülmüş yataqlar üçün rüsumları ödəməyə məcbur etməyə çağırıb.
Koulman, "Amerika dünyanın ən böyük neft və qaz istehsalçısı olduğu üçün bu siyasətlər və daha da sərt tədbirlər təhlükəsi qlobal enerji təchizatının kəsilməsi və qiymətlərin artması ilə nəticələnib" deyib.
Onun fikrincə, normal vəziyyətdə neftin yüksək qiyməti hasilatı artıracaq investisiyaları cəlb edəcək, bu da öz növbəsində bazarın sabitləşməsinə gətirib çıxaracaq. "Lakin buna Bayden administrasiyasının ənənəvi yanacaqlara qarşı düşmən münasibəti mane olur" deyə müəllif qeyd edib.
Martın 8-də Bayden Rusiyadan enerji idxalını və Rusiyanın enerji sektoruna yeni investisiyaları qadağan edən sərəncam imzalayıb. ABŞ Maliyyə Nazirliyi Rusiyadan ölkəyə neft, neft məhsulları, LNG və kömür idxalı üzrə əməliyyatların aprelin 22-dək başa çatdırılması üçün son tarix qoyub. Bundan sonra ABŞ-da yanacaqdoldurma məntəqələrində benzinin qiyməti nəzərəçarpacaq dərəcədə artmağa başlayıb, baxmayaraq ki, ölkədə inflyasiya artıq uzun müddət yüksək səviyyədə idi. Martda inflyasiya fevraldakı 7,9%-dən 8,5%-ə qədər sürətləndi ki, bu da 1981-ci ildən bu yana ən yüksək rəqəmdir.
Ağ Ev rəhbəri qiymət artımını Ukrayna ətrafındakı böhran ilə izah edib. Bundan əlavə, o, Rusiyanın hərəkətləri səbəbindən bütövlükdə ABŞ-da inflyasiyanın rekordlar qırdığını iddia edib. Rusiya prezidenti Vladimir Putin də öz növbəsində Qərbin dünyada enerji qiymətlərinin artmasına görə Rusiyanı günahlandırmağa çalışdığını vurğulayıb. (Marja)
